Incidenti në Bullgari: I riu shqiptar dyshohet si autor i zjarrvënies ndaj antenave Starlink

Një 19-vjeçar shqiptar me shtetësi gjermane, i identifikuar me inicialet I.Z., është vënë në shënjestër të autoriteteve bullgare, pasi dyshohet si një nga autorët kryesorë të sulmit me zjarr ndaj pajisjeve të internetit satelitor Starlink, ngjarje kjo e regjistruar në afërsi të kryeqytetit Sofje. Organet e drejtësisë në Bullgari kanë lëshuar një kërkesë zyrtare për ndalimin e tij dhe të personit tjetër të përfshirë, T.B., ndërkohë që hetimet për zbardhjen e plotë të motiveve dhe rrethanave vijojnë intensivisht. Sipas të dhënavetë ekspertizës zyrtare, pasojat e këtij sulmi kanë qenë të rënda: tri prej antenave janë shkrumbuar plotësisht, dy të tjera kanë pësuar dëmtime të pjesshme, kurse tri të tjera janë përfshirë nga flakët, por pa u shkatërruar tërësisht. Të dy të dyshuarve u rëndojnë akuzat zyrtare për zjarrvënie të qëllimshme në mungesë, pasi gjykata kompetente në Sofje ka miratuar tashmë urdhërarrestet evropiane për kapjen e tyre. Gjatë seancës dëgjimore në gjykatë, vëmendje e veçantë iu kushtua automjetit të përdorur për t'u afruar në vendin e ngjarjes, për të cilin u raportua se mbante targa gjermane dhe, sipas pretendimeve të njërit prej avokatëve, i përkiste një shtetasi nga Kosova. Megjithatë, autoritetet ende nuk kanë konfirmuar zyrtarisht nëse makina ishte në pronësi të ndonjërit prej të rinjve, apo nëse ky fakt vërteton drejtpërdrejt përfshirjen e tyre në këtë akt penal. Përfaqësuesit ligjorë të caktuar nga gjykata kanë hedhur poshtë provat e deritanishme, duke theksuar se individët që shfaqen në regjistrimet e kamerave të sigurisë janë të maskuar dhe fytyrat e tyre mbeten të paidentifikueshme. Nga ana tjetër, akuza mbështet pozitat e saj tek një sërë provash materiale, ku përfshihen fotografitë, trajektorja dhe të dhënat e lëvizjes së automjetit, dëshmitë e mbledhura në terren, si dhe ekspertiza teknike e dëmeve në pajisje. Korniza ligjore në Bullgari parashikon dënime të rënda për këtë vepër penale, ku nëse të dyshuarit shpallen fajtorë nga gjykata, ata rrezikojnë të dënohen me burgim nga tre deri në dymbëdhjetë vjet. Ky incident vjen në një periudhë kur në vende të ndryshme të Evropës janë shënuar episode të ngjashme që kanë cënuar infrastrukturën e rrjetit Starlink, ndonëse autoritetet ende nuk kanë konfirmuar ndonjë lidhje direkte mes rastit në Sofje dhe ngjarjeve të tjera në kontinent.