Tragjedia në Pejë: Kryeparlamentarja Haxhiu kërkon drejtësi dhe hetim urgjent për vrasjen e Arlinda Zekajt

Kryetarja e Kuvendit të Kosovës, Albulena Haxhiu, ka reaguar me shqetësim të lartë lidhur me vrasjen e tronditëse të Arlinda Zekajt, ngjarje kjo e regjistruar mbrëmë në fshatin Vitomiricë të Pejës, duke kërkuar njëkohësisht një hetim të gjithanshëm nga autoritetet kompetente. Në mesazhin e saj, Haxhiu ka shprehur tronditjen e thellë shpirtërore për humbjen e jetës së Arlindës, e cila kishte humbur jetën vetëm pak çaste pasi ishte kthyer në shtëpinë e saj nga stacioni i policisë, ku kishte kërkuar ndihmë përmes një denoncimi për dhunë në familje. Sipas njoftimit zyrtar të Kuvendit, Haxhiu ka sjellë në vëmendje një mesazh që viktima i kishte dërguar Prokurorisë në Pejë vetëm tri ditë më parë: ‘Uroj që të mos vijë dita kur ju dhe institucionet përgjegjëse të detyroheni të jepni llogari vetëm pasi të jetë marrë jeta ime’. Ajo ka theksuar se rrethana të tilla alarmante kërkojnë zbardhje rrënjësore. Kur ndodh një femicid ndërkohë që viktima kishte kërkuar zyrtarisht mbrojtje, hetimet nuk duhet të ndalen vetëm te akti i vrasjes, por duhet të analizojnë mënyrën se si janë trajtuar raportimet e saj, si është bërë vlerësimi i rrezikut dhe çfarë masash janë ndërmarrë. Haxhiu ka kërkuar që të analizohet çdo veprim apo mosveprim i mundshëm institucional, duke kërkuar përgjegjësi ligjore kudo që konstatohen shkelje. Në vijim të reagimit, kryeparlamentarja ka bërë të ditur se, në kuadër të mandatit mbikëqyrës të legjislativit, do të kërkojë angazhimin e komisioneve parlamentare përkatëse për të vlerësuar punën e mekanizmave shtetërorë kundër dhunës në familje dhe parandalimit të femicidit, duke i dhënë prioritet vlerësimit të rrezikshmërisë dhe bashkëpunimit ndërinstitucional. “Është përgjegjësia jonë të sigurohemi që ligjet që miratojmë të zbatohen dhe që mangësitë të trajtohen para se të kushtojnë jetë të tjera. Djalit të Arlindës dhe të gjithë të afërmve të saj u shpreh ngushëllimet e mia më të sinqerta”, ka përfunduar Kryetarja Haxhiu.