Nevojë urgjente për unitet: Apeli për themelimin e Këshillit Koordinues të partive politike në të gjitha trojet shqiptare

Politika aktuale shqiptare nuk e ka zanafillën sot, pavarësisht qasjes së disa aktorëve të rinj që shpesh veprojnë pa një bazë të qëndrueshme historike. Zhvillimet e fundit gjeopolitike në Ballkan, Evropë dhe në shkallë globale dëshmojnë se rendi ndërkombëtar dhe drejtësia botërore kanë devijuar nga parimet e tyre që nga nisja e këtij shekulli. Në këto rrethana, është tejet e domosdoshme që spektri politik i shpërndarë në pesë rajone të trojeve etnike të afrohet përmes krijimit të një Këshilli Kombëtar. Ky organ do të duhej të përbëhej nga personalitetet më eminente dhe autoritare, të cilët aktualisht mbeten anash skenës kryesore politike. Duke qenë dëshmitar i kohës që në hapat e parë të pluralizmit në Ballkan dhe gjatë themelimit të Lidhjes Demokratike të Kosovës, kujtoj se si Presidenti Ibrahim Rugova, ndonëse udhëhiqte LDK-së, themeloi Këshillin Koordinues të Partive Politike të Shqiptarëve në mbarë trojet etnike. Ky hap vizionar pati për qëllim bashkimin e forcave politike, intelektuale, shkencore dhe kombëtare rreth një kauze të përbashkët patriotike, e cila mbajti gjallë aspiratat dhe të drejtat e shqiptarëve kudo në trojet e tyre. Një shoqëri që shkëput lidhjen me proceset historike të gjeneratave të kaluara dhe neglizhon mundin e djersën e derdhur ndër vite, rrezikon të humbasë orientimin dhe të veprojë në dëm të interesave të veta afatgjata. Megjithatë, situata aktuale dëshmon se skena politike shqiptare është shndërruar shpesh në burim përçarjesh mbarëkombëtare. Duket qartë se historia po përsëritet, pasi liderët politikë ende dështojnë të tejkalojnë mentalitetin e vjetër të bajraktarizmit. Partnerët ndërkombëtarë dhe miqtë e kombit shqiptar shprehin shqetësim të thellë për krizat dhe përçarjet aktuale: bllokadat institucionale dhe tensionet politike në Republikën e Kosovës, përçarjet e faktorit politik në Maqedoni të Veriut, zhvillimet e diskutueshme në Malin e Zi nën udhëheqjen e Dritan Abazoviqit, si dhe ndarjet ndërpartiake në Preshevë, Bujanoc e Medvegjë, të cilat paralajmërojnë rrezikun e një dështimi me përmasa të rënda. Përballë këtij realiteti, apelojmë që elita intelektuale të ndërmarrë një nismë kombëtare për të themeluar Këshillin Koordinues ose Këshillin Kombëtar. Ky institucion do të shërbente si një mekanizm kyç për të harmonizuar qëndrimet politike, duke mundësuar që shqiptarët të flasin me një zë të unifikuar për sfidat e sotme dhe perspektivën e tyre evropiane.