Tragjedia në Vitomiricë, Haxhiu kërkon llogaridhënie institucionale për vrasjen e Arlinda Zekajt

Kryetarja e Kuvendit të Kosovës, Albulena Haxhiu, ka reaguar ashpër pas vrasjes tronditëse të Arlinda Zekajt, e cila ndodhi mbrëmë në fshatin Vitomiricë të Pejës, vetëm pak çaste pasi viktima ishte kthyer në banesën e saj nga stacioni policor, ku kishte kërkuar ndihmë për dhunën në familje. Nëpërmjet një shkrimi në rrjetet sociale, Haxhiu shprehu pikëllimin dhe tronditjen e saj të thellë, duke nënvizuar se ngjarja tragjike kërkon një hetim gjithëpërfshirës për të zbardhur reagimin dhe trajtimin që autoritetet i bënë denoncimeve të viktimës. “E tronditur thellësisht nga vrasja e Arlinda Zekajt mbrëmë në Vitomiricë të Pejës. Arlinda u vra pak minuta pasi ishte kthyer në shtëpi nga stacioni policor, ku kishte denoncuar dhunën në familje”, ka shkruar Haxhiu. Ajo ka bërë me dije se vetëm tri ditë para se të ndodhte krimi i rëndë, Zekaj i kishte dërguar një mesazh shqetësues Prokurorisë në Pejë, duke paralajmëruar hapur për rrezikin fatal që i kanosej. “Uroj që të mos vijë dita kur ju dhe institucionet përgjegjëse të detyroheni të jepni llogari vetëm pasi të jetë marrë jeta ime”, kishte shkruar Zekaj në mesazhin drejtuar Prokurorisë, sipas reagimit të Haxhiut. Kryetarja e Kuvendit shtoi se procesi hetimor nuk duhet të mbetet vetëm te faktet e vrasjes, por duhet të analizojë në detaje mënyrën e trajtimit të rasteve, shkallën e vlerësimit të rrezikshmërisë dhe veprimet e organeve kompetente. “Duhet të sqarohet çdo veprim dhe mosveprim i mundshëm institucional dhe, aty ku vërtetohen shkelje, të përcaktohet përgjegjësia përkatëse”, ka deklaruar Haxhiu. Krahas kësaj, ajo ka bërë të ditur se në kuadër të mandatit mbikëqyrës të legjislativit, do të kërkojë angazhimin e komisioneve parlamentare për të kontrolluar efikasitetin e mekanizmave mbrojtës kundër dhunës në familje dhe parandalimit të femicidit. Haxhiu theksoi se fokusi kryesor duhet të vendoset te vlerësimi i riskut dhe bashkëpunimi ndërinstitucional, me qëllim që boshllëqet e sistemit të identifikohen dhe të korrigjohen para se të shënohen tragjedi të reja. Në mbyllje të reagimit të saj, ajo i drejtoi një mesazh ngushëllimi familjarëve të viktimës. “Djalit të Arlindës dhe të gjithë të afërmve të saj u shpreh ngushëllimet e mia më të sinqerta”, ka përfunduar ajo.