Tmerr në Roskovec: 37-vjeçari qëllon me armë pranë shtëpisë së ish-partneres

Një ngjarje e rëndë ka tronditur zonën e Roskovecit, ku një 37-vjeçar ka përfunduar në prangat e policisë pasi dyshohet se ka hapur zjarr me armë afër shtëpisë së ish-bashkëjetueses së tij. Incidenti është shënuar në fshatin Luar. Menjëherë pas sinjalizimit për të shtëna, efektivët e Stacionit të Policisë Roskovec, në bashkëpunim të ngushtë me Komisariatin e Policisë Fier, u vunë në lëvizje për të zbuluar dinamikën e plotë dhe për të kapur autorin e dyshuar. Falë reagimit në kohë rekord të strukturave ligjzbatuese, u bë i mundur identifikimi dhe vënia në pranga e shtetasit B. M., 37 vjeç, i cili banon në Roskovec. Në bazë të hetimeve paraprake, dyshohet se shkak për këtë akt janë bërë motive të dobëta, duke shtyrë 37-vjeçarin të qëllojë me armë zjarri pikërisht në ambientet e jashtme të banesës ku strehohej ish-partnerja e tij. Ndërkohë, dosja procedurale i ka kaluar Prokurorisë për hetime të mëtejshme. Ai do të përballet me akuzat për veprat penale “Mbajtja pa leje dhe prodhimi i armëve, armëve shpërthyese dhe i municionit”, “Dhuna në familje”, si dhe “Veprimet në kundërshtim me vendimin e gjykatës”.