Tragjedia në Pejë: Vigan Qorroli kërkon llogaridhënie nga prokurorja për fatin e Arlinda Zekajt

Deputeti i Lëvizjes Vetëvendosje, Vigan Qorroli, ka kërkuar llogari publike dhe ligjore nga prokurorja Suada Hamza, lidhur me mënyrën se a u trajtua si duhet rasti i tragjik i Arlinda Zekajt. Ai ka hedhur akuza të forta ndaj saj, duke pohuar se ajo nuk ka vepruar ndaj thirrjeve të viktimës për mbrojtje institucionale. Duke e shoqëruar reagimin e tij me letrën e lënë nga e ndjera, Qorroli ka theksuar se ajo kishte besuar se shteti do t'i dilte në krah. "Kjo është letra e Arlindës. E shkruar me dorën e saj, me shpresën se dikush do ta dëgjonte, se dikush do ta kuptonte rrezikun për jetën e saj, se dikush do të ndërhynte për ta mbrojtur", ka shkruar ndër të tjera deputeti. Qorroli ka insistuar se prokurorja duhet të ballafaqohet me përgjegjësinë ligjore për shkak të shpërfilljes së pretenduar të kërkesave urgjente për ndihmë. Pasi ka shprehur hidhërimin e thellë për këtë ngjarje të rëndë, ai ka kërkuar që thirrja e Arlindës të mos harrohet lehtë. "Sa herë duhet të kërkojë një grua ndihmë, që të ketë të drejtën të jetojë e sigurt?", ka pyetur ai retorikisht, duke shtuar se dokumenti i lënë nga viktima përbën një dëshmi të qartë të dështimit për t'i ofruar siguri. "Le të bëhet kujtesë, ndërgjegje dhe përgjegjësi. Sepse asnjë grua nuk duhet të vdesë pasi ka kërkuar të jetojë", ka përfunduar mesazhin e tij Qorroli. Kujtojmë se ngjarja e rëndë ndodhi të dielën në mbrëmje në fshatin Vitomiricë të Pejës, ku një grua u privua nga jeta, ndërsa i dyshuar kryesor për këtë krim është kunati i saj. Sipas njoftimit zyrtar nga Policia e Kosovës, personi i dyshuar ndodhet ende në arrati dhe po kërkohet nga organet e rendit. Pas kësaj vrasjeje tronditëse, në opinion u publikua letra që viktima Arlinda Zekaj ia kishte drejtuar Prokurorisë më 22 tetor 2026. Aty ajo kërkonte ndërhyrje urgjente dhe kishte denoncuar mungesën e reagimit institucional për ta mbrojtur nga rreziku që i kanosej.