Pedri mbas disfatës në 'El Clasico': Kampionati nuk vendoset sot, duhet të ngremë kokën

Mesfushori i Barcelonës, Pedri, ka bërë thirrje që skuadra e tij të kalojë sa më shpejt disfatën 1-2 kundër Real Madridit dhe të fokusohet plotësisht te sfidat e ardhshme, duke kujtuar se rruga për titullin kampion në La Liga është ende e gjatë. “Kampionati është shumë i gjatë. Kjo është një ndeshje që të gjithë dëshironim ta fitonim për t'ia dhuruar tifozëve tanë. Largohemi me ndjenja pikëllimi, por duhet të përqendrohemi te takimi i radhës. Trofeu i La Ligës nuk fitohet në këtë përballje”, u shpreh futbollisti spanjoll për platformën DAZN menjëherë pas përfundimit të 'El Clasicos'. Në analizën e tij, Pedri pranoi hapur se katalanasit nuk bënë paraqitjen e duhur, veçanërisht gjatë 45 minutave të para, periudhë në të cilën skuadra nuk arriti të shfaqte potencialin e saj të vërtetë. “Nuk ishim vetvetja në fushë. Na munguan shumë elemente dhe kishim mundësi të bënim shumë më mirë. Në pjesën e dytë arritëm barazimin, por pikërisht kur po kalonim momentin tonë më të mirë, ata na ndëshkuan përmes një kundërsulmi ku nuk u mbrojtëm siç duhet”, shtoi ai. Lojtari i mesfushës u ndal gjithashtu te pasaktësitë në zotërimin e topit, duke vënë në dukje se ritmi i skuadrës ishte i ulët dhe se pati humbje të shumta topash sidomos në fraksionin e parë të lojës. “Na mungua dinamika me topin në këmbë. Lëviznim shumë ngadalë dhe dhuruam topa në mënyrë të panevojshme. Përballë një kundërshtari të kalibrit të Real Madridit, gabime të tilla paguhen shtrenjtë”, përfundoi ai. Përmes këtij suksesi në kuadër të javës së dhjetë të kampionatit spanjoll, Real Madridi ka siguruar tri pikë me vlerë, ndërkohë që Barcelona mbetet e detyruar të kthejë rezultatet në ndeshjet e ardhshme për të mos humbur hapin në garën për kreun e klasifikimit.