Zgjedhjet presidenciale në Brazil: Gjykata Supreme merr vendimin e papritur pas kërkesave të Lulës dhe djalit të Bolsonaros

Gjykata Supreme e Brazilit ka ndërhyrë në procesin zgjedhor duke urdhëruar shtyrjen me dy orë të procesit të votimit, i cili sipas planit fillestar parashikohej të mbyllej në orën 17:00. Vendimi ka ardhur pas kërkesave të njëpasnjëshme nga dy kampet rivale për t'i dhënë më shumë hapësirë qytetarëve për të ushtruar të drejtën e tyre. Flavio Bolsonaro, kandidati konservator dhe njëkohësisht djali i ish-presidentit të dënuar Jair Bolsonaro, kishte kërkuar shtyrjen e orarit në tri shtete të ndryshme, duke argumentuar se kushtet atmosferike ishin përkeqësuar ndjeshëm. Nga ana tjetër, presidenti në detyrë Luiz Inacio Lula da Silva kërkoi nga autoritetet kompetente zgjedhore që afati i votimit të zgjatej në nëntë shtete, pasi sipas shtabit të tij të fushatës, shërbimi i transportit publik ishte ndërprerë artificialisht. Pjesa më e madhe e votuesve brazilianë varen tërësisht nga transporti publik për të udhëtuar drejt qyteteve ku janë të regjistruar për të votuar. Tensionet u rritën edhe më shumë kur një gjykatë në Bahia, e cila konsiderohet si një bastion elektoral për Lulën në verilindje të vendit, urdhëroi ndalimin e një zyrtari të lartë të transportit në qytetin e Salvadorit, nën dyshimet se kishte ndërmarrë shkurtime të qëllimshme të linjave të autobusëve. Gjatë një deklarate për media, kreu i shtetit në largim Luiz Inacio Lula da Silva dënoi ashpër këto veprime, duke u shprehur: “Askush nuk duhet të heqë dorë nga e drejta e tij për të votuar sepse ndonjë biznesmen i paskrupullt ose ndonjë kryetar bashkie i korruptuar dhe i pandershëm po përpiqet t’i pengojë ata të votojnë”.