Pas triumfit ndaj Irlandës, Vedat Muriqi thyen heshtjen për largimin e Amir Rrahmanit: Duhet respektuar vendimi i tij

Përfaqësuesja e Kosovës ka siguruar një fitore tejet të rëndësishme me rezultat minimal 1:0 përballë Irlandës, në ndeshjen e vlefshme për Ligën e Kombeve. Pas përfundimit të sfidës, sulmuesi kryesor i "Dardanëve", Vedat Muriqi, analizoi këtë sukses, ndërsa u ndal të komentonte edhe vendimin e fundit të mbrojtësit Amir Rrahmani për t'u larguar nga kombëtarja. Muriqi u shpreh se mbajtja e shiritit të kapitenit nuk është një përgjegjësi e re për të, pasi e ka kryer këtë rol edhe në të kaluarën. Megjithatë, ai pranoi se bëhet fjalë për një temë delikate, duke pasur parasysh rrugëtimin e gjatë që ka ndarë me Rrahmanin që nga moshat e reja. "Nuk është një pozicion i panjohur për mua. Kam qenë kapiten edhe më parë kur ka munguar Amiri. Nuk dëshiroj të futem në këto tema pas një fitoreje kaq të bukur, pasi natyrisht janë çështje paksa shqetësuese, duke pasur parasysh që me Amirin kemi luajtur bashkë që nga grupmoshat U16 te Kosova. Ai ka marrë një vendim, të cilin duhet ta respektojmë dhe ta falënderojmë për kontributin e tij. Amiri mbetet një nga lojtarët më të suksesshëm në historinë e Kosovës. Unë personalisht, por edhe në emër të gjithë skuadrës, e falënderoj përzemërsisht për gjithçka që ka dhënë. Tani na mbetet vetëm të shikojmë përpara", deklaroi Muriqi.