Real Madrid merr shpresa: Thibaut Courtois mund të jetë në fushë për “El Clasico”

Një situatë e papritur me portierin Thibaut Courtois kishte shqetësuar kampin e Real Madridit në prag të sfidës madhështore “El Clasico”. Megjithatë, bëhet fjalë vetëm për një gjendje gripale që ka prekur gardianin belg, situatë kjo që detyroi stafin teknik të ftojë urgjentisht në minutat e fundit portierin e ri Iliya Voloshin për t'iu bashkuar skuadrës në udhëtim. Sipas raportimeve të fundit nga media prestigjioze “The Athletic”, Courtois po bën përpjekje maksimale për të fituar kohën dhe për të nisur ndeshjen si titullar. Ai ndjehet dukshëm më mirë në aspektin shëndetësor dhe ruan një optimizëm të lartë se do të jetë i gatshëm për këtë përballje jetike të “Los Blancos”. Orët në vijim do të jenë vendimtare për të kuptuar nëse portieri kryesor do t'ia dalë të mbrojë portën e madrilenëve në këtë duel klasik.