“Më goditën papritur, ende e kam plumbin në sy” – Flet tifozi i plagosur gjatë protestës së studentëve

Erjon Vishkulli po përballet me momente kritike dhe dhimbje të forta në spital, ku po merr trajtimin e nevojshëm mjekësor pas lëndimit të rëndë në syrin e majtë, pasi u qëllua me plumb gome gjatë zhvillimit të protestës së studentëve një dit më parë. Në një rrëfim ekskluziv dhënë për gazetarin Endi Tufa, tifozi i njohur i Kombëtares ka sjellë në vëmendje dinamikën e plotë të incidentit që mund t'i kushtojë humbjen e përhershme të shikimit në syrin e majtë. “Shkova të takoja shokët dhe do të ikja. Kisha hequr maskën e oksigjenit dhe në atë moment takova një shok gazetar. I kisha diku 30 metra larg policët, pa asnjë reagim, pa asgjë”, u shpreh ai. Më tej, Vishkulli tregon momentin kritik të goditjes dhe pasojat me të cilat po ndeshet aktualisht: “Vetëm kur më vjen një goditje, eca rreth dy metra dhe rashë në tokë. Vazhdoj ta kem ende plumbin e gomës në sy. Nuk e di tani të them se sa i lartë është rreziku, por e lehtë nuk është, sepse kam shumë dhimbje. Shqipëria është e jona”.