Thirrje nga Obiliqi: Kryetari kërkon angazhim qytetar për pagesën e rregullt të mbeturinave

Kryetari i Komunës së Obiliqit, Halil Thaçi, i ka ftuar banorët e kësaj komune që të tregojnë përgjegjësi duke shlyer rregullisht faturat e mbeturinave, me qëllim ndërtimin e një mjedisi sa më të pastër dhe jetësor. Nëpërmjet një adresimi në rrjetet sociale, kreu i komunës ka vënë in-focus faktin se higjiena urbane ndikon direkt në mirëqenien e përgjithshme dhe në perspektivën e brezave të rinj. Thaçi ka bërë të qartë se shlyerja me kohë e këtyre detyrimeve mundëson menaxhimin më efikas të mbeturinave, garantimin e shëndetit familjar dhe nxitjen e ngritjes cilësore të shërbimeve publike. "OBILIQI I PASTËR FILLON NGA SECILI PREJ NESH! Të dashur qytetarë të Komunës së Obiliqit, Pastërtia nuk është vetëm çështje e pamjes së qytetit, por mbi të gjitha çështje e shëndetit tonë dhe e së ardhmes së fëmijëve tanë! Çdo pagesë që bëni për shërbimin e mbeturinave është një kontribut i drejtpërdrejtë për një Obiliq më të pastër, një ambient më të shëndetshëm dhe një shërbim më cilësor. Kur paguajmë, ndihmojmë që mbeturinat të largohen me kohë. Kur mbajmë pastër ambientin, mbrojmë shëndetin e familjeve tona. Kur përmbushim obligimet tona, krijojmë mundësi për shërbime edhe më të mira. Si kryetar i Komunës, jam i përkushtuar që Obiliqi të jetë një vend më i pastër, më i gjelbër dhe më i shëndetshëm për të gjithë. Por këtë synim mund ta arrijmë vetëm së bashku! Prandaj, ju ftoj që t’i kryeni rregullisht pagesat për shërbimin e mbeturinave dhe të bëheni pjesë e ndryshimit që duam ta shohim në komunën tonë. Sepse kur investojmë në pastërti, investojmë në shëndet! Obiliqi është shtëpia jonë e përbashkët. Ta mbajmë pastër, ta duam dhe ta ruajmë!"