Në stilo-aksion kinematografik në Skenderaj: I dyshuari përplas automjetin e Policisë dhe arratiset, lëndohen dy zyrtarë

Një operacion ndjekjeje në Skenderaj është shndërruar në ngjarje dramatike, pasi një veturë që po i shmangej forcave të rendit ka përplasur makinën zyrtare duke e detyruar të dalë nga rruga. Ngjarja ka lënë të lënduar dy zyrtarë policorë, kurse drejtuesi i mjetit ka arritur të largohet, duke e lënë automjetin e dëmtuar të braktisur në një zonë tjetër. Incidenti ka ndodhur të shtunën, më 24 tetor 2026, rreth orës 21:45, në fshatin Llaushë të Skenderajve. Sipas të dhënave zyrtare, gjithçka nisi gjatë patrullimit rutinë, kur një ekip i Policisë vërejti një veturë civile me targa vendore që po qarkullonte në mënyrë të dyshimtë dhe të rrezikshme. Megjithëse efektivët i bënë shenjë qartë për ndalesë, shoferi nuk respektoi urdhrin dhe mori drejtimin për në Llaushë me shpejtësi të madhe. Patrulla u vu menjëherë në ndjekje të tij për ta ndaluar. Gjatë kësaj ndjekjeje intensive, automjeti i dyshuar goditi drejtpërdrejt makinën e Policisë, duke e nxjerrë jashtë rrugës. Si pasojë e kësaj përplasjeje të fortë, mjeti zyrtar u përplas me një shtyllë elektrike, ndërsa dy policët brenda tij pësuan lëndime. Pavarësisht aksidentit, personi që drejtonte automjetin nuk u ndal për asnjë moment. Pak kohë më vonë, organet e rendit e lokalizuan veturën në fshatin Rezallë, e cila ishte e braktisur dhe e dëmtuar, pa asnjë njeri përreth. Grupet hetimore nisën menjëherë veprimet operative për të zbuluar identitetin e personit që ndodhej në timon. Në kuadër të hetimeve, fillimisht u intervistua pronari i mjetit, i cili deklaruar se e kishte dorëzuar automjetin te një mekanik. Në anën tjetër, mekaniku i pyetur nga autoritetet ka paraqitur një version tjetër të ngjarjes. Sipas tij, automjeti ka qenë i parkuar para servisit dhe çelësat kanë qenë brenda, duke ngritur dyshime se dikush mund ta ketë marrë fshehurazi pa leje, ndonëse vetë nuk kishte vërejtur mungesën e tij deri në momentin e kontaktit nga Policia. Kjo ndjekje që përfundoi me lëndimin e dy efektivëve ka lapur hapur dilemën se kush ishte në të vërtetë në drejtim të mjetit gjatë arratisjes. Dy efektivët e lënduar morën ndihmën e parë mjekësore në Qendrën Kryesore të Mjekësisë Familjare në Skenderaj, për t'u transferuar më pas për trajtim të mëtutjeshëm në Spitalin Rajonal të Mitrovicës. Pas përfundimit të trajtimit, të dy janë lejuar të kthehen në shtëpi. Në vendin e ngjarjes kanë mbërritur njësitet përkatëse për të kryer ekzaminimet e nevojshme dhe procedurat hetimore. Me urdhër të Prokurorit të Shtetit, çështja është hapur nën veprën penale “Shkaktimi i rrezikut të përgjithshëm”. Deri në këto momente, Policia nuk ka ndonjë të dyshuar të identifikuar, ndërsa hetimet vijojnë intensivisht për zbardhjen e plotë të rrethanave.