Dyndje në pikat kufitare, shqiptarët e Luginës udhëtojnë drejt vendvotimeve

Fluks i madh udhëtarësh dhe pritje të gjata janë regjistruar këtë të diel në pikën kufitare të Muçibabës, e cila lidh qytetin e Gjilanit me Preshevën, teksa qytetarët synojnë të kalojnë kufirin për të ushtruar të drejtën e votës. Shkak i këtyre kolonave është dyndja e qytetarëve nga Lugina e Preshevës që banojnë në Kosovë, të cilët po i përgjigjen në masë të madhe thirrjes për të mbështetur listën e përbashkët të koalicionit shqiptar, të radhitur me numrin 17 në zgjedhjet parlamentare në Serbi. Radhë të gjata automjetesh, që arrijnë deri në 800 metra gjatësi, janë shënuar gjithashtu edhe në pikën e kalimit kufitar te Dheu i Bardhë.