Tentoi të kalonte kufirin me 100 mijë euro të falsifikuara të qepura në xhaketë: Arrestohet 19-vjeçari nga Shkupi në Bullgari

Autoritetet policore në Bullgari kanë vënë në pranga një 19-vjeçar nga Shkupi, i identifikuar me inicialet H.D., pasi gjatë kontrollit kufitar iu zbuluan rreth 100 mijë euro të falsifikuara. Gjatë marrjes në pyetje nga organet e hetuesisë, i riu ka mohuar çdo fajësi, duke pretenduar se nuk ishte në dijeni se paratë që mbante me vete ishin të kalpiuara. Sipas informacioneve nga prokuroria, dyshohet se i dyshuari kishte qëndruar për një periudhë të shkurtër në Turqi, kohë gjatë së cilës kishte veshur një xhaketë në astarin e së cilës ishin fshehur dhe qepur me kujdes kartëmonedhat e falsifikuara euro. Në pikën e kalimit kufitar, sjellja e tij kishte ngritur dyshimet e autoriteteve. Ai ishte shfaqur i shqetësuar, ishte mbështetur fort pas ulëses së automjetit dhe kishte mbajtur shikimin drejt tavanit të mjetit. Pas ndalimit dhe kontrollit të telefonit të tij celular, hetuesit kanë zbuluar një sërë fotografish që shfaqnin kartëmonedha të ngjashme të falsifikuara, të shkrepura gjatë muajve të kaluar të këtij viti. Në disa prej këtyre imazheve figuronte edhe vetë i riu. Gjatë seancës dëgjimore, avokati mbrojtës kërkoi nga gjykata caktimin e një mase më të butë sigurie, konkretisht garanci financiare, duke përmodur si argument moshën e re të të pandehurit dhe mungesën e precedentëve të mëparshëm penalë. Pavarësisht kërkesës së mbrojtjes, gjykata ka vendosur që t'i caktojë masën e paraburgimit, duke marrë për bazë dyshimet e forta për kryerjen e veprës penale dhe rrezikun real të arratisjes nëse do të lirohej me masë më të lehtë.