Kriza energjetike, Gjini: Importi ka kapur shifrën e 27 milionë eurove

Kryetari i Aleancës për Ardhmërinë e Kosovës (AAK), Ardian Gjini, ka bërë të ditur se vendi po shpenzon shuma alarmante prej rreth dy milionë eurosh në ditë vetëm për blerjen e rrymës nga jashtë, duke adresuar kritika të rënda ndaj ekzekutivit për menaxhimin e situatës në këtë sektor. Gjatë një konference për media, Gjini nënvizoi se shpenzimet totale për importin e energjisë elektrike tashmë kanë prekur kuotën e 27 milionë eurove. Ai shtoi se kapaciteti i prodhimit vendor mbetet në kuotën e rreth 372 megavatëve, ndërkohë që nevoja totale e konsumit kapërcen shifrën e 800 megavatëve. Duke e cilësuar situatën aktuale si një bllokadë të vërtetë, kryetari i AAK-së theksoi se vendi po ballafaqohet me një kolaps energjetik. Sipas tij, rikthimi i importit masiv dhe me kosto jashtëzakonisht të larta do të rëndojë direkt mbi buxhetin e qytetarëve të Kosovës. Më tej, Gjini e ka fajësuar Qeverinë për dështim në menaxhimin e burimeve energjetike dhe ka paralajmëruar ndërmarrjen e hapave institucionalë. Ai njoftoi se subjekti që ai drejton do të inicojë një interpelancë në Kuvendin e Kosovës, duke u bërë thirrje organit të akuzës dhe institucioneve kompetente që t'i hyjnë hetimit të kësaj çështjeje me seriozitetin më të madh.