Stigmatizimi i qytetarëve nga kreu i qeverisë, Dhoma e Avokatisë Sarandë lëshon reagimin e ashpër: Kujton praktikat e fletërrufeve

Dhoma e Avokatisë Sarandë ka ngritur zërin fuqishëm kundër veprimit të Kryeministrit Edi Rama, i cili ka publikuar imazhet e disa individëve, përfshirë edhe studentë, duke i shoqëruar ato me pretendime për përfshirje në aktivitete kriminale. Nëpërmjet një deklarate zyrtare që mban firmën e kryetarit Rigels Dervishi, ky institucion bën të qartë se kjo metodë rrezikon seriozisht parimin e prezumimit të pafajësisë, respektohet dinjiteti njerëzor, jeta private dhe siguria e të dhënave personale. Sipas këtij institucioni, ekspozimi i tillë publik ku fotografitë lidhen me akuza penale shkel hapur parimet e legjislacionit kombëtar dhe standardet e vendosura nga Gjykata Europiane e të Drejtave të Njeriut (GJEDNJ). Në reagim nënvizohet se asnjë vendim i formës së prerë nuk e justifikon linçimin dhe stigmatizimin publik, pasi sistemi ynë ligjor garanton rehabilitimin dhe riintegrimin e individëve në shoqëri, duke shmangur dënimin e përjetshëm përmes etiketimve. Avokatët e Sarandës e krahasojnë këtë sjellje me metodat e dikurshme të “fletërrufeve”, të përdorura nga paraardhësit politikë të kreut të qeverisë për të ekspozuar dhe denigruar të rinjtë e qytetarët, duke e quajtur rikthimin e një fryme të tillë si plotësisht të papranueshëm për një vend demokratik. Në përfundim, Dhoma e Avokatisë Sarandë kërkon me ngulm ndalimin e menjëhershëm të këtyre praktikave dhe kërkon nga Kryeministri që të tregojë përgjegjësi institucionale, duke ndalur përdorimin e pushtetit për të etiketuar dhe dëmtuar imazhin e qytetarëve.