Masakra e Mejës: Nisin seancat gjyqësore në mungesë për 53 të pandehurit

Sot, duke filluar nga ora 08:30, do të zhvillohet seanca gjyqësore në mungesë ndaj 53 personave të akuzuar për kryerjen e Masakrës së Mejës. Prokuroria Speciale e Republikës së Kosovës (PSRK) kishte ngritur aktakuzën në mungesë kundër tyre në dhjetor të vitit 2023, e cila më pas u ndryshua më 23 dhjetor 2024. Deri më tani, të gjithë të pandehurit vazhdojnë të jenë në arrati. Më 25 maj 2026, Gjykata e Apelit mori vendim për të kthyer çështjen në rivendosje, pasi kishte shqyrtuar vendimin paraprak të Gjykatës Themelore në Prishtinë, e cila kishte konfirmuar aktakuzën e ngritur nga Prokuroria Speciale. Sipas dokumentit të akuzës, ngjarjet janë regjistruar gjatë periudhës 1998-1999 në fshatrat e Komunës së Gjakovës. Të pandehurit akuzohen se kanë vepruar në bashkëkryerje si pjesë e një Ndërmarrjeje të Përbashkët Kriminale, duke mbajtur këto pozita zyrtare gjatë luftës: Momir Stojanoviq, si shef i Departamentit të Sigurisë së Komandës në Korpusin e Prishtinës; Sreten Çamoviq, si shef i Departamentit të Shtetit për Siguri (UDB); Nikolla Miqunoviq, në cilësinë e komandantit të Njësive Rezervë; Millovan Kovaçeviq, si shef i Sekretariatit të Punëve të Brendshme në Gjakovë; Sergej Peroviq, si shef i Sigurimit në Brigadën 52 të Artilerisë dhe Raketave të Mbrojtjes Ajrore në Garnizonin e Gjakovës, Korpusi i Prishtinës - Armata III; Verolub Zhivkoviq, si komandant i Postëkomandës Pararojë dhe Shef i Shtabit të Korpusit të Prishtinës; Millan Kotur, si shef i Këmbësorisë në Komandën e Korpusit të Prishtinës; Radomir Çoliq, si komandant i Njësive “Posebne Jednice Policije” (PJP) të Policisë në Gjakovë; Dragutin Josifoviq, si komandant i Stacionit Policor në fshatin Ponoshevc të Gjakovës; Franko Simatoviq, si komandant i Stacionit Paramilitar “Jedinica za Specijalne Operacije” (JSO); Momçillo Stanojeviq, si komandant i Mbrojtjes Territoriale; Vllatko Vukoviq, si komandant i Batalijonit të Dytë të Brigadës së Motorizuar; si dhe Ilija Todorov, në cilësinë e komandantit të Brigadës 63 parashutiste.