Vala e protestave zgjerohet, artistët dhe punonjësit e medias i bashkohen tubimit të studentëve para Kryeministrisë

Valës së pakënaqësisë popullore ku janë përfshirë pedagogë, mjekë dhe përfaqësues të bizneseve, i është bashkuar zyrtarisht edhe Sindikata e Pavarur e Artit, Kulturës dhe Medias e Shqipërisë, e cila ka konfirmuar pjesëmarrjen në protestën kombëtare të 24 tetorit në krah të studentëve dhe qytetarëve. Nëpërmjet një deklarate publike, kjo sindikatë u ka bërë thirrje të gjithë anëtarëve të saj, artistëve dhe punonjësve të fushës së kulturës dhe informimit që të mblidhen nesër, në orën 11:00, para ndërtesës së Kryeministrisë. Organizatorët theksojnë se dalja në shesh vjen si pasojë e ndërgjegjësimit qytetar për fatin e vendit dhe domosdoshmërisë për të garantuar të drejtat e punëmarrësve. “Jemi punëmarrës, jemi prindër, jemi qytetarë. E ardhmja e këtij vendi është edhe përgjegjësia jonë”, thuhet në qëndrimin zyrtar të sindikatës. Axhenda e kërkesave të tyre përfshin sigurimin e pagave dhe pensioneve dinjitoze, rritjen e sigurisë në mjediset e punës, forcimin e mbrojtjes sociale, si dhe garantimin e lirisë së shprehjes pa frikë. Përfaqësuesit e saj insistojnë se misioni i tyre parësor mbetet mbështetja e qytetarëve dhe mbrojtja e integritetit të tyre. “Nesër do të jemi në shesh, aktivisht dhe paqësisht, me artin, kulturën dhe fjalën e lirë në krah të qytetarëve. Me besimin se bashkë mund të ndërtojmë një të ardhme që u jep të rinjve arsye për të qëndruar dhe shpresë për të ecur përpara”, shprehet sindikata në thirrjen e saj. Thirrja përmbyllet me moton: “Bashkë për dinjitet, për të drejta dhe për një të ardhme me shpresë!”.