Mbështetje totale për studentët, Sali Berisha bën thirrje për protestë kombëtare në Bulevard

Kryetari i Partisë Demokratike, Sali Berisha, ka bërë të qartë se forca politike që ai drejton do të jetë në ballë të çdo lëvizjeje opozitare kundër kabinetit qeveritar të drejtuar nga kryeministri Edi Rama. Gjatë deklaratës së tij, kreu i selisë blu garantoi se Partia Demokratike do t'i qëndrojë pranë kauzës studentore, duke siguruar pjesëmarrjen aktive të deputetëve, drejtuesve dhe përfaqësuesve të saj në shesh. Sipas tij, të rinjtë e Forumit Rinor të Partisë Demokratike nga institucionet e arsimit të lartë kanë qenë të pranishëm në tubime që në hapat e parë dhe do të vazhdojnë të jenë pjesë integrale e tyre. Në këtë linjë, Berisha ka drejtuar një thirrje të hapur për të gjithë qytetarët që t'i bashkohen protestës kombëtare të thirrur nga opozita për ditën e nesërme në kryeqytet, në mbrojtje të të rinjve që protestojnë. “Nesër është thirrur protestë kombëtare e PD në mbështetje të studentëve dhe unë edhe një herë i them Edi Ramës: hiq dorë nga dhuna ndaj studentëve, sepse në mënyrë absolute vendosmëria jonë është mbrojtja e tyre me të gjitha mjetet në rast nevoje”, u shpreh Berisha. Më tej, ai paralajmëroi se çdo akt dhune ndaj studentëve nuk do të kalojë pa u ndëshkuar nga shoqëria, ndërsa ftoi demokratët dhe qytetarët e tjerë që të dynden drejt bulevardit “Dëshmorët e Kombit”. “Dhuna me studentët nuk do të tolerohet jo vetëm nga të afërmit e tyre, por nga asnjë qytetar shqiptar. Ndaj dhe nesër të gjithë qytetarët shqiptarë, të gjithë demokratet e demokratët do lënë çdo gjë, do vërshojnë drejt bulevardit “Dëshmorët e Kombit” për t’i dhënë mësimin e duhur Edi Ramës: mos prek studentët! Studentët po sakrifikojnë me një guxim të paparë në rrugët dhe sheshet e Tiranës për çdo shqiptar”, përfundoi ai.