Tiranë: Gjykata lë të lirë 13 protestues, mes tyre një të mitur – caktohet masa e sigurisë

Gjykata Penale e Tiranës ka shqyrtuar çështjen e protestuesve të ndaluar, duke vendosur masën e sigurisë “detyrim paraqitjeje” për 12 prej tyre dhe duke e vlerësuar arrestimin si të ligjshëm. Gjatë seancës, organi i akuzës kishte kërkuar një masë shtesë ndalimi për këta persona, e cila konsistonte në ndalimin e qëndrimit pranë institucioneve shtetërore dhe në zonat ku mbahen tubime, mirëpo kjo kërkesë nuk është pranuar nga trupi gjykues. Ndërkohë, një gjyqtare e posaçme për të miturit ka marrë në shqyrtim rastin e protestuesit të 13-të, një 14-vjeçar i cili ishte shoqëruar nga forcat e rendit gjatë zhvillimit të protestës. Edhe për të miturin, gjykata ka konfirmuar ligjshmërinë e arrestimit dhe ka caktuar të njëjtën masë sigurie, atë të “detyrimit për t'u paraqitur”.