Verdikti në Hagë, Abdixhiku: Është gabim fatal të thuhet se po dënohet UÇK-ja

Kryetari i Lidhjes Demokratike të Kosovës, Lumir Abdixhiku, ka bërë thirrje që skena politike dhe qytetarët të shmangin çdo deklaratë që lidh vendimet e gjykatës në Hagë ndaj ish-krerëve me fajësimin e vetë Ushtrisë Çlirimtare të Kosovës. Edhe pse theksoi se nuk dëshiron të paragjykojë zhvillimet e mëtejshme gjyqësore, duke qenë se çështja ndodhet në fazën e apelimit, kreu i LDK-së insistoi se ky narrativ është i gabuar dhe i dëmshëm për vendin. "Ju lutem, mos e thoni, mos e thoni që dënohet UÇK-ja, sepse s’dënohet UÇK-ja. Ju lutem, kjo nuk bën të thuhet kështu… edhe kështu ua kam kërkuar të gjithë liderëve politikë… edhe kështu e kërkoj vazhdimisht dhe dua të argumentojmë, dhe jam në gjendje të argumentoj me secilin njeri kundërshtar të republikës së Kosovës që UÇK-ja nuk është kriminale", deklaroi Abdixhiku gjatë një paraqitjeje televizive. Ai u shpreh se nuk mund dhe nuk do të parashikojë vendimet e trupit gjykues, duke kërkuar kujdes maksimal në përzgjedhjen e fjalëve dhe ruajtjen e integritetit të luftës çlirimtare nga çdo etiketim i padrejtë. Në këtë linjë, politikani shtoi se një qasje e tillë gjuhësore nuk i shërben interesave kombëtare dhe se institucionet apo përfaqësuesit e vendit duhet të jenë jashtëzakonisht të kujdesshëm për të mos marrë mbi vete barrën e një autorësie që nuk i takon historisë së ndritur të luftës.