Berlini alarmohet nga Moska: Kancelari gjerman paralajmëron valë të re të operacioneve të spiunazhit

Kancelari gjerman, Friedrich Merz, e ka cilësuar si një arritje të rëndësishme kapjen e një shtetasi ukrainas në territorin gjerman, i cili dyshohet se ka spiunuar në favor të Kremlinit, teksa ka lëshuar njëkohësisht një paralajmërim të fortë për rrezikun e sulmeve të ngjashme në të ardhmen. “Me gjasë do të shohim raste të tilla më shpesh në muajt dhe vitet e ardhshme”, deklaroi Merz më 22 tetor, duke theksuar se shteti gjerman po përballet aktualisht me një intensitet të lartë të veprimtarive armiqësore të inteligjencës. Duke vlerësuar operacionin e fundit, ai shtoi: “Në këtë aspekt, është sukses që sot arritëm ta zbulojmë këtë rast. Por, nuk duhet të mashtrohemi: veprimtaritë e inteligjencës ruse në Gjermani vazhdojnë të jenë në nivel të lartë”. I dyshuari u prangos në landin e Brandenburgut, rajon që përfshin kryeqytetin Berlin. Sipas të dhënave nga Prokuroria e Përgjithshme Federale, ai akuzohet se ka shfrytëzuar lidhjet e tij brenda sektorit evropian të mbrojtjes për të siguruar të dhëna konfidenciale ushtarake. Ky zhvillim vjen në një periudhë kur Gjermania, e cila renditet ndër mbështetëset kryesore të Ukrainës me armatim dhe logjistikë, ndodhet në alarm të lartë për shkak të shtimit të dukshëm të akteve të sabotimit dhe spiunazhit që lidhen me Moskën. Shtetasi ukrainas, i ndaluar të enjten në qarkun Oder-Spre, dyshohet se ka bashkëpunuar me shërbimet e inteligjencës ruse përmes një ndërmjetësi që nga muaji korrik i vitit 2025 ose edhe më herët. Hetuesit besojnë se ai ka grumbulluar të dhëna për aspektet e prodhimit të tankeve, municioneve dhe lëndëve plasëse, si dhe për pozicionimin e personel G dhe bazave ushtarake që shërbejnë për mbrojtjen e krahut lindor të NATO-s. Pjesë e informacioneve kanë qenë të hapura për publikun, ndërsa në raste të tjera i dyshuari ka vënë në shënjestër individë specifikë brenda industrisë së mbrojtjes për të siguruar të dhënat e kërkuara, bënë të ditur prokurorët gjermanë. Të premten, i pandehuri pritet të dalë para trupit gjykues, ku do të vendoset masa e sigurisë për mbajtjen e tij në paraburgim. Intensifikimi i rrjetit rus të spiunazhit Që nga fillimi i agresionit ushtarak rus ndaj Ukrainës në shkurt të vitit 2022, autoritetet gjermane kanë vënë në pranga shpeshherë persona të dyshuar se kanë punuar për interesat e Moskës, përfshirë arrestime të regjistruara edhe gjatë këtij viti. Në muajin janar, organet e drejtësisë urdhëruan arrestimin e një gruaje me shtetësi të dyfishtë, gjermane dhe ukrainase, nën dyshimet se i kishte përcjellë informacione të ndjeshme një agjenti rus të vendosur brenda Ambasadës së Rusisë. Ndaj saj tashmë janë ngritur zyrtarisht akuzat penale. Kryeprokurori i Gjermanisë, Jens Rommel, ka tërhequr vëmendjen se aktivitetet e zbulimit që i vishen Rusisë nuk kufizohen vetëm te grumbullimi i të dhënave, por synojnë gjithashtu përgatitjen e akteve të sabotimit dhe goditjeve të mirëfillta. Në shumë prej rasteve, synimi kryesor mbetet dëmtimi dhe minimi i mbështetjes ushtarake dhe politike që Gjermania i jep Ukrainës, pati deklaruar Rommel gjatë muajit qershor.