Fushata e vaksinimit anti-grip: Mbi 55 mijë qytetarë marrin dozën mbrojtëse, prijnë të moshuarit

Interesimi i qytetarëve për imunizimin kundër gripit sezonal mbetet i lartë, ku që nga 14 tetori e deri më tani janë regjistruar gjithsej 55,535 persona. Statistikat tregojnë se mbi 60 për qind e të vaksinuarve i takojnë grupmoshës mbi 65 vjeç, të cilët përbëjnë edhe kategorinë më të rrezikuar. Kjo vaksinë, e cila ofrohet falas, u dedikohet posaçërisht individëve mbi 65 vjeç, personave që vuajnë nga sëmundje kronike, punonjësve shëndetësorë, grave shtatzëna, si dhe fëmijëve të moshës nga gjashtë muaj deri në pesë vjeç. Autoritetet shëndetësore u bëjnë thirrje të gjithë qytetarëve që bëjnë pjesë në grupet e rrezikut dhe që ende nuk e kanë kryer këtë proces, që të paraqiten sa më parë për t'u vaksinuar. Procesi i imunizimit në shkallë vendi u zyrtarizua në Institutin e Shëndetit Publik, ku ministri i Shëndetësisë, Sasho Klekovski, mori personalisht dozën e tij të vaksina kundër gripit sezonal, duke shënuar kështu edhe nisjen zyrtare të vaksinimit në të gjitha njësitë shëndetësore anembanë vendit. Me këtë rast, ministri Klekovski ka theksuar se imunizimi mbetet mburoja më efikase ndaj virusit të gripit. Sipas tij, vaksina ndihmon ndjeshëm në uljen e rrezikut për shfaqjen e formave të rënda klinike, parandalimin e komplikimeve shëndetësore dhe shmangien e pasojave fatale, me fokus të veçantë te popullata e ndjeshme.