Kthimi i Ligjit për Specialen, organizatori i protestës: Kush cenon vlerat e UÇK-së do të na ketë përballë

Çlirim Haziri, nismëtari i protestës “Jo në Emrin Tim”, ka dalë me një reagim zyrtar pasi Presidentja e vendit vendosi t'ia kthejë Kuvendit për rishqyrtim Ligjin për Gjykatën Speciale, pas kërkesës së Partisë Demokratike të Kosovës (PDK). Nëpërmjet një postimi në rrjetet sociale, Haziri ka sqaruar se qëllimi i tyre nuk ka qenë kurrë miratimi i një nisme ligjore thjesht për statistika, por sigurimi i një dokumenti me bazë të fortë juridike dhe efektshmëri reale në praktikë. “Nuk besoj se dikush do të tentojë të luajë me UÇK-në dhe me këtë kauzë. Por kushdo që mendon se mund ta bëjë këtë, duhet ta dijë se do të na ketë përballë”, ka theksuar ai ndër të tjera. Në vazhdim të shkrimit të tij, Haziri solli në vëmendje angazhimin e gjatë në sheshe, duke kujtuar qëndrimin 21-ditor me një kërkesë të vetme: që institucionet vendimmarrëse të angazhohen për mbrojtjen e të drejtave të ish-krerëve të Ushtrisë Çlirimtare të Kosovës që po mbahen në Hagë. Sipas tij, protestuesit kanë qenë të parët që kanë kërkuar ndryshimin apo përmirësimin e çdo pike të ligjit nëse ajo paraqiste mangësi, duke vënë në pah se për ta primare nuk është se kush e inicon apo e voton aktin ligjor, por përmbajtja dhe dobia e tij. Organizatori bëri të ditur se nisma dhe hapat e mëtutjeshëm do të ndiqen me vëmendje të shtuar, duke premtuar monitorim të rreptë të çdo neni e pike deri në miratimin përfundimtar dhe zbatimin e ligjit. Në mbyllje të reagimit, Haziri rikonfirmoi se qëndrimet, kërkesat dhe vetë kauza mbeten të palëkundura, ndërsa theksoi se uniteti i dëshmuar për UÇK-në do të vazhdojë të mbrohet në çdo rrethanë.