Nga Edinburgu te Champs-Élysées: Zbulohet itinerari spektakolar i Turit të Francës 2027

Turi i Francës ka nisur zyrtarisht numërimin mbrapsht për edicionin e tij të 114-të, duke ngritur siparin mbi një rrugëtim që premton emocione të forta për dashamirësit e çiklizmit. Pas publikimit zyrtar të hartës së itinerarit, gjithçka është gati për nisjen e kësaj gare prestigjioze që do të pushtojë rrugët në korrik të vitit 2027. Edicioni i ardhshëm do të karakterizohet nga një start madhështor, pasi qyteti i Edinburgut do të vishet kuq e zi nga entuziazmi për të mirëpritur ngjarjen më të rëndësishme në kalendarin ndërkombëtar të çiklizmit. Ceremonia e njohur si “Grand Départ” e Turit të Francës 2027 shënon herën e tretë në histori që kjo garë merr jetë në Mbretërinë e Bashkuar, pas atyre në Londër në vitin 2007 dhe Leeds në vitin 2014. Ky fillim spektakolar do të zyrtarizohet të premten, më 2 korrik, përmes etapës së parë nga tre të planifikuara që do të zhvillohen ekskluzivisht në territorin britanik. Ndërkohë, sipari i këtij edicioni do të ulet të dielën, më 25 korrik, në bulevardin legjendar Champs-Élysées në Paris. Etapa e fundit, në vijimësi të traditës së vendosur në dy edicionet e kaluara, do të rezervojë një finale dramatike me tre ngjitje sfiduese në zonën e Montmartre.