Talenti shqiptar shkëlqen me Interin në Europë, trajneri Bigica: Po i shfrytëzon më së miri shanset

Talenti Alen Vukaj ka lënë sërish gjurmë me fanellën e skuadrës së të rinjve të Interit në kompeticionin prestigjioz UEFA Youth League, duke realizuar një gol vendimtar në triumfin e zikaltërve përballë Shakhtar Donetsk. Paraqitja fantastike e sulmuesit nuk ka kaluar pa u vënë re nga trajneri i ekipit, Bigica, i cili ka thurur elozhe për angazhimin e tij maksimal dhe mënyrën se si po i shfrytëzon minutat e dhëna në fushë. Pas përfundimit të sfidës, tekniku italian ka shprehur hapur kënaqësinë e tij për fitoren e arritur, ndërsa në prononcimin e dhënë për mediat është ndalur posaçërisht te forma e Vukajt, duke i rezervuar vlerësimet më të larta. "Vukaj është një djalë që angazhohet shumë në stërvitje. Ai është i aftë për të shfrytëzuar mundësitë që po i jap", u shpreh trajneri i Interit Primavera gjatë deklaratës së tij. Për lojtarin, ky realizim në UEFA Youth League dhe vlerësimi publik nga stafi teknik përfaqësojnë një pikë kthese të rëndësishme, teksa ai synon të sigurojë më shumë hapësira dhe të vazhdojë të bindë me paraqitjet e tij pozitive në fanellën zikaltër.