Nostalgji nga Katalonja: Lionel Messi zbulon prapaskenat e arritjeve të arta me Barçën

Lionel Messi ka sjellë në vëmendje me shumë mall vitet e arta te Barcelona, një periudhë kur blaugranët dominonin futbollin botëror dhe argëtues në fushën e blertë përkrah legjendave të klubit. Në një intervistë të realizuar në Oviedo për agjencinë “EFE”, sulmuesi argjentinas ka ndarë kujtimet e tij më të bukura nga Spanja, pak ditë para se të vlerësohet zyrtarisht me çmimin “Princesha e Asturias” për sportin 2026. “Patëm fatin të fitonim gjithçka, por edhe ta bënim në atë mënyrë siç e bëmë. Kënaqeshim duke luajtur, duke fituar dhe duke arritur gjëra të rëndësishme. Mbi të gjitha, kënaqeshim në përditshmëri, gjatë stërvitjeve. Kalonim shumë mirë”, është shprehur Messi gjatë rrëfimit të tij. “Barcelona është klubi i jetës sime” Duke folur për peshën që ekipi katalanas mban në zemrën e tij, fituesi i Topit të Artë pranoi se është e vështirë të përmbledhësh me fjalë një lidhje kaq të fortë, duke e konsideruar Barçën si një pjesë thelbësore të ekzistencës së tij. Shtatë herë fituesi i Topit të Artë e ka vlerësuar si një fat të jashtëzakonshëm mundësinë për të ndarë fushën dhe dhomën e zhveshjes me ikona të tilla si Xavi, Andrés Iniesta dhe Carles Puyol. Ai, gjithashtu, theksoi lidhjen e pashkëputur shpirtërore me qytetin e Barcelonës, ku ka përjetuar kujtimet më të çmuara të jetës dhe ku i kanë lindur tre fëmijët e tij. Botërori, ëndrra që i dha kuptim karrierës Pasi kishte pushtuar majat e futbollit evropian me klubin spanjoll, Messi veçoi triumfin historik me Përfaqësuesen e Argjentinës në Kupën e Botës Katar 2022, duke e cilësuar si realizimin e një ëndrre që i tejkaloi përmasat e çdo imagjinate. Momenti i shënimit të golave në finalen e madhe kundër Francës mbetet maja e karrierës së tij sportive, duke marrë parasysh madhështinë dhe peshën e sfidës. Gjatë bisedës, ylli argjentinas ndau edhe një detaj nga marrëdhënia me babanë e tij, Jorge, me të cilin ka analizuar dhe diskutuar çdo ndeshje e stërvitje ndër vite. “Këshilla më e rëndësishme ishte të mos hiqja dorë nga përpjekjet. Të merrja topin dhe të provoja, pavarësisht nëse dilte mirë apo keq, sepse gjithmonë ekzistonte edhe një aksion tjetër”, kujtoi ai me mirënjohje. Në pyetjen se si dëshiron të mbetet në kujtesën e sportdashësve, Messi u përgjigj prerazi se synon të mbahet mend si një atlet i madh, i cili nuk u dorëzua kurrë në ndjekjen e synimeve dhe idealeve të tij.