Kthehet në Kuvend Ligji për Gjykatën Speciale, Presidenca sqaron arsyet e vendimit

Presidentja e Kosovës, Justina Shiroka Pula, ka marrë vendim që t'ia rikthejë Kuvendit për rishqyrtim Ligjin për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar. Gjatë ditës së sotme, e para e shtetit ka pranuar kërkesën zyrtare nga Grupi Parlamentar i Partisë Demokratike të Kosovës, në cilësinë e sponsorizuesit të këtij ligji, me qëllim që t'i jepet Kuvendit hapësira e nevojshme për ta analizuar edhe një herë, sidomos nenet që prekin juridiksionin dhe mandatin e këtij institucioni gjyqësor, si dhe për të siguruar mbrojtjen e plotë të të drejtave kushtetuese të të akuzuarve që po ballafaqohen me drejtësinë atje. Në shpjegimin e këtij hapi institucional, Presidentja Shiroka Pula ka vënë në pah kontributin e jashtëzakonshëm, sakrificën dhe luftën e Ushtrisë Çlirimtare të Kosovës, si dhe të drejtuesve të saj për lirinë dhe shtetësinë e vendit. "Ajo ka rikujtuar gjithashtu mbështetjen e saj për Deklaratën e Kuvendit të Republikës së Kosovës të 28 shtatorit 2026, lidhur me aktgjykimin e Dhomave të Specializuara në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit", thuhet në njoftim. Për më tepër, në komunikatën zyrtare për media bëhet e ditur se ajo ka ripërsëritur qëndrimin e saj të prerë kundër çdo tendence për t'ia tjetërsuar historinë Kosovës, për të hedhur hije dyshimi mbi natyrën çlirimtare të luftës, apo për të vënë në të njëjtin nivel popullin që kërkonte liri e mbijetesë me aparatin shtetëror që ushtroi dhunë ndaj tij. "Në arsyetimin e vendimit, Presidentja ka bërë të ditur se ka zhvilluar dhe po vazhdon konsultimet me përfaqësues të institucioneve dhe subjekteve përkatëse shtetërore, me qëllim të bashkërendimit të veprimeve ndërinstitucionale dhe diplomatike për dokumentimin, mbrojtjen dhe afirmimin e së vërtetës historike të Luftës Çlirimtare të Kosovës dhe të rolit të Ushtrisë Çlirimtare të Kosovës, si dhe për mbrojtjen sa më të mirë të të drejtave dhe interesave të krerëve të saj që po gjykohen në Dhomat e Specializuara", njoftoi Presidenca.