Momente paniku në ajër: Avionit të skuadrës së njohur të hokejit i duhet ulja e jashtëzakonshme emergjente

Fluturimi i skuadrës së hokejit Pittsburgh Penguins, pjesë e Ligës Kombëtare (NHL), është ndërprerë mbrëmjen e djeshme, pasi aeroplani u detyrua të kthehej mbrapsht drejt aeroportit të Salt Lake Cityt menjëherë pas nisjes, si pasojë e përkeqësimit të papritur të shëndetit të 19-vjeçarit Ben Kindel. Talenti i ri i këtij sporti u dërgua me shpejtësi për në spital për t'i nënshtruar kontrollemjekësore të hollësishme. Ekipi nga Pittsburghu po udhëtonte drejt shtëpisë pas ndeshjes si mysafir kundër Utah Mammoth, e cila ishte mbyllur të hënën në mbrëmje me një humbje prej 5:4. Megjithatë, fluturimi u pezullua pasi sulmuesi Kindel shfaqi shqetësime shëndetësore menjëherë pasi mjeti fluturues u ngrit në ajër. Fatmirësisht, në kabinë ndodhej mjeku i skuadrës, dr. Darmesh Vyas, i cili së bashku me pjesëtarët e tjerë të stafit shëndetësor reaguan menjëherë duke i dhënë ndihmën e parë sportistit. Piloti ktheu mjetin fluturues drejt Aeroportit Ndërkombëtar të Salt Lake Cityt, ku një autoambulancë po priste në pistë për të marrë lojtarin. Ai u transferua menjëherë në spitalin e Universitetit të Utahut, ku mbetet nën kujdesin dhe mbikëqyrjen e mjekëve. Nëpërmjet një njoftimi zyrtar, Pittsburgh Penguins bëri me dije se lojtari ishte i vetëdijshëm, i orientuar qartë dhe në gjendje shëndetësore stabile. “Aeroplani i Pittsburgh Penguins u kthye në Aeroportin Ndërkombëtar të Salt Lake Cityt, pak pas ngritjes, për shkak të një problemi shëndetësor që përjetoi sulmuesi Ben Kindel. Mjeku i klubit, dr. Darmesh Vyas nga Qendra Mjekësore UPMC, si dhe pjesëtarë të stafit mjekësor, ndodheshin në aeroplan dhe i ofruan menjëherë ndihmë Benit. Pas uljes, atë e priste një autoambulancë dhe u transportua në spitalin e Universitetit të Utahut për ekzaminime të mëtejshme”, thuhet ndër të tjera në komunikatën e lëshuar nga klubi. Drejtuesit e skuadrës nga Pittsburghu nënvizuan se shëndeti i sportistit dhe respektimi i privatësisë së familjes së tij përbëjnë prioritetin kryesor, ndërsa njoftuan se të dhëna të reja do të bëhen publike në momentin e duhur.