Superliga e Kosovës zbulon orarin: Ndeshje interesante dhe derbi i xhiros së 11-të në Hajvali

Federata e Futbollit të Kosovës ka zyrtarizuar kalendarin e plotë të takimeve për xhiron e 11-të në elitën e futbollit vendor, ku pesë sfidat e kësaj jave do të zhvillohen përgjatë një periudhe tre-ditore. Fushata e kësaj xhiroje hapet qysh të premten (nesër) nga ora 18:00, me përballjen mes Gjilanit dhe Llapit. Ekipi i drejtuar nga trajneri Zekirija Ramadani do të kërkojë triumfin e tretë rresht, ndërsa në krahun tjetër do të ketë skuadrën e drejtuar nga Tahir Batatina, e cila po kalon një periudhë rezultatesh jo të mira. Intensiteti do të vazhdojë gjatë fundjavës, ku të shtunën janë planifikuar dy ndeshje, ndërsa dy të tjera do të mbbyllin xhiron të dielën. Gjatë ditës së shtunë, Ballkani dhe Malisheva do të udhëtojnë për të matur forcat respektivisht ndaj Vushtrrisë dhe Drenicës, me të dyja ekipet mysafire që synojnë pikët e plota, edhe pse vendasit pritet të luftojnë fort për çdo centimetër të fushës. Ndërkaq, orari i së dielës sjell përballjen mes Feronikelit 74 dhe Dukagjinit, ku dy skuadrat do të futen në fushë me synimin e qartë për të arkëtuar tri pikët, duke pasur parasysh edhe formën e mirë të mysafirëve. Vëmendja kryesore e kësaj jave do të jetë te derbi ndërmjet Prishtinës dhe Dritës, duel ky që do të tohet në Kampin Nacional në Hajvali. Bardhekaltërit e kryeqytetit po kalojnë një edicion fantastik duke udhëhequr renditjen tabelore dhe synojnë të ruajnë ecurinë e tyre pa humbje. Në anën tjetër, skuadra nga Gjilani vjen në këtë duel pas paraqitjeve solide dhe me moral të ngritur, çka paralajmëron një ndeshje tejet të fortë dhe të hapur për çdo rezultat në këtë udhëtim sfidues.