Ndryshime në mbrojtjen e Kadri Veselit para Apelit, Rodney Dixon: Klienti nuk dëmtohet

Ekipi mbrojtës i ish-kryeparlamentarit Kadri Veseli ka pësuar ndryshime të reja në prag të nisjes së procedurave të Apelit në Dhomat e Specializuara në Hagë, ku dy bashkëavokate janë larguar nga angazhimi i tyre. Sipas dokumentit zyrtar të lëshuar nga Zyra e Regjistrit, avokati kryesor i Veselit, Rodney Dixon, ka marrë vendim më 13 tetor për ndërprerjen e menjëhershme të kontratave për dy bashkëavokatet, Annie O’Reilly dhe Kerrie Ann Rowan. Vetëm një ditë më vonë, konkretisht më 14 tetor, Zyra e Regjistrit ka certifikuar zyrtarisht përfundimin e misionit të tyre brenda trupës mbrojtëse të ish-liderit të UÇK-së. Në shkresën e dërguar drejtuar Zyrës së Mbrojtjes, avokati Dixon ka theksuar se ky largim nuk do të ketë asnjë ndikim negativ në mbrojtjen e interesave të Kadri Veselit dhe nuk do të shkaktojë vonesa në ecurinë e procesit gjyqësor. Ky zhvillim procedural është njoftuar zyrtarisht dhe është dorëzuar pranë Panelit të Apelit në kuadër të Dhomave të Specializuara të Kosovës me seli në Hagë.