Tragjedia në Onkologji, reagon ministri Vitia: Pretendimet për mungesë barnash u publikuan pa u verifikuar

Ministri i Shëndetësisë, Arben Vitia, ka adresuar rastin e ndjeshëm të pacientes që, sipas raporteve të fundit, humbi jetën në Klinikën e Onkologjisë, gjoja për shkak të mungesës së medikamenteve. Gjatë fjalës së tij në Kuvend, ministri Vitia e nisi me ngushëllimet më të sinqerta për familjen dhe të afërmit e të ndjerës, ndërkohë që ngriti shqetësimin për mënyrën se si është trajtuar ky rast në media pa u konfirmuar më parë faktet. Sipas shpjegimit të tij, gjithçka nisi pas një postimi në rrjetet sociale nga një shoqatë, ku pretendohej se fataliteti kishte ndodhur si pasojë e mungesës së barnave. Ai theksoi se pavarësisht përpjekjeve të menjëhershme të drejtuesve të Klinikës së Onkologjisë për të kontaktuar autorët e atij postimi, në fillim komunikimi ishte i pamundur. Më tej, ministri shtoi se informacioni u transmetua nga një gazetare pa kaluar përmes filtrit të verifikimit me institucionet apo organizatën përkatëse. “Klinika e Onkologjisë ka bërë përpjekje që ta kontaktojë shoqatën që ka postuar këtë informacion, fillimisht e pamundur. Pastaj një gazetare pa bërë asnjë verifikim të lajmit, paraqet menjëherë, bile edhe në lajmet qendrore të një mediumi”, u shpreh Vitia. Duke u ndalur te shkaqet e ngjarjes, ai bëri të qartë se përcaktimi i tyre kërkon analiza të thella dhe ekspertizë mjeko-ligjore. “Për shkakun e vdekjes nevojitet autopsia dhe shumë procedura të tjera për të qenë i qartë. Nuk mundet as mjeku ta konstatojë shkakun e vdekjes në raste të tilla”, deklaroi ministri. Në fund, Vitia bëri me dije se drejtori i Klinikës së Onkologjisë kishte mbledhur të gjitha të dhënat e nevojshme dhe kishte dalë me një sqarim zyrtar për opinionin publik, por sipas tij, pati një qasje selektive nga ana e atyre që e përhapën fillimisht lajmin e pakonfirmuar. “Drejtori i Klinikës Onkologjike i merr të gjitha informacionet dhe del me reagim publik ku ka shpjeguar të gjithë situatën. Për çudi të gjitha mediat që e kanë shpërndarë paraprakisht lajmin e pasaktë, e qesin e publikojnë reagimin instituicional përveç gazetares dhe mediumit”, përfundoi Vitia.