“Jam i lumtur te Arsenal, por…”: David Raya zbulon dëshirën e fshehtë për të ardhmen

Guardiani i portës së Arsenalit, David Raya, ka shprehur hapur ambiciet e tij për të luajtur në kampionatin spanjoll përpara se t'i japë fund rrugëtimit të tij sportiv, gjatë një prononcimi të dhënë së fundmi për gazetën e njohur “Marca”. I pyetur rreth planeve për të ardhmen, portieri spanjoll nuk e ka fshehur synimin e tij për të provuar veten në vendlindje, pavarësisht se aktualisht po kalon momente fantastike në Londër. “Po, do të doja vërtet. Do të doja ta provoja La Ligën. Për momentin, jam shumë i lumtur këtu te Arsenal, por sigurisht që do të doja ta provoja veten në ligën spanjolle”, u shpreh ai. Gjithashtu, Raya ka vlerësuar lart nivelin e futbollit në Spanjë, duke e cilësuar atë si një nga garat më sfiduese në qarkullim dhe duke lënë të hapur mundësinë e një transferimi të mundshëm në vitet në vijim. “Besoj se është një ligë shumë konkurruese. Ndoshta, në të ardhmen, mund të luaj për një klub spanjoll. Jam spanjoll dhe do të më pëlqente shumë të luaja atje, kjo është e sigurt”, përfundoi deklaratën e tij David Raya.