Seanca plenare degjeneron në përplasje fizike dhe tensione ekstreme në Kuvend

Seanca e sotme plenare në Kuvend është shoqëruar me situata kaotike, debate të ashpra dhe konfrontime fizike mes ligjvënësve të opozitës dhe atyre të mazhorancës, duke detyruar kreun e Kuvendit, Niko Peleshi, që të vendosë ndërprerjen e punimeve. Përplasjet nisën ndërkohë që mazhoranca vijonte votimin e projektligjeve të parashikuara në rendin e ditës, nën flakën e protestës së opozitës. Deputetët opozitarë kanë bllokuar sallën duke goditur tavolinat, duke duartrokitur për të shkaktuar zhurmë dhe duke vendosur karriget përmbi tavolina. Opozita kërkon me ngulm lirimin e studentëve të arrestuar, duke shfaqur gjithashtu fotografi që, sipas pretendimeve të tyre, dëshmojnë dhunën e ushtruar ndaj tyre. Në sallë është parë edhe kreu i Partisë Demokratike, Sali Berisha, i cili iu bashkua protestës duke duartrokitur. Tensionet kanë kaluar në nivel fizik kur deputeti i Partisë Demokratike, Fidel Kreka, i është afruar ligjvënësve socialistë, çka ka sjellë shkëmbimin e fjalëve të ashpra. Në këtë moment ka ndërhyrë ish-ministri Ervin Hoxha për të qetësuar gjakrat, por situata ka dalë menjëherë jashtë kontrollit pasi Kreka e ka shtyrë atë me të dy duart. Hoxha ka tentuar t'i përgjigjet, por ndërhyrja e shpejtë e punonjësve të Gardës dhe kolegëve të tjerë ka shmangur një përshkallëzim më të rëndë. Më pas, situata ka degraduar në një 'zbarkim' masiv të deputetëve opozitarë në zonën ku qëndrojnë socialistët. Flamur Noka është afruar për t'u hequr kartonat dhe mikrofonin përfaqësuesve të mazhorancës, përfshirë kreun e Grupit Parlamentar të PS, Taulant Balla, teksa ky i fundit ishte duke komunikuar. Punonjësit e Gardës kanë tentuar ta ndalojnë Nokën, por pa sukses, ndërsa Garda është pozicionuar si mburojë para foltores për të mbrojtur rendin. Përballë kësaj situate të tensionuar, ku debatet verbale dhe konfrontimet fizike bënë të pamundur vijimin normal të punimeve, kryetari i Kuvendit, Niko Peleshi, ka njoftuar zyrtarisht ndërprerjen e seancës plenare.