Vështirësi në Gjermani për sulmuesin që refuzoi Shqipërinë, flirton me Kosovën

Për Enis Rexhepin, situata në arenën ndërkombëtare dhe në klub nuk po kalon pa sfida. Talenti i akademisë së Shtutgartit nuk ka mundur të sigurojë minuta loje në sfidën e fundit të skuadrës së parë. Gjatë triumfit 3-0 që Shtutgarti regjistroi kundër Heidenheimit, sulmuesi 18-vjeçar u mjaftua vetëm me një vend në stol, duke mos u aktivizuar fare nga stafi teknik gjatë takimit. Kujtojmë se Rexhepi u bë qendër e vëmendjes publike pas vendimit të tij për të refuzuar ftesën e Federatës Shqiptare të Futbollit. Sulmuesi i talentuar nuk figuroi në listat e asnjë prej grupmoshave kuqezi, qoftë te U-19 apo te U-21. Në këtë panoramë të paqartë, burimet tregojnë se Federata e Futbollit e Kosovës ka intensifikuar përpjekjet për ta bindur lojtarin që të ndryshojë kurs dhe të vishet me fanellën e tyre. Paraqitja e tij e fundit me grupmoshat e Shqipërisë daton në muajin mars me ekipin U-19. Ndryshe nga raste të tjera si ai i Arman Durmshit, Rexhepi ruan ende të drejtën ligjore për të bërë një zgjedhje të re sa i përket Kombëtares që do të përfaqësojë. Mbetet për t'u parë se si do të rrjedhin ngjarjet për premtimin e madh të shkollës gjermane të futbollit.