Real Madrid jep alarmin: Kylian Mbappe rrezikon ndeshjen e madhe në Champions League

Për sulmuesin e kombëtares së Francës, Kylian Mbappe, angazhimet me fanellën e 'Gjelave' kanë marrë një kthesë negative, pasi aventura e tij aktuale në Ligën e Kombeve ka përfunduar para kohe. Pas kryerjes së ekzaminimeve të detajuara mjekësore, të cilat erdhën si pasojë e dëmtimit të pësuar në sfidën e fundit të Francës përballë Turqisë, klubi i Real Madridit ka lëshuar një komunikatë zyrtare. Sipas stafit mjekësor, ylli francez ka pësuar një “hiperekstension të gjurit të majtë”, një problem fizik që do ta detyrojë të qëndrojë larg fushave të blerta për një periudhë prej të paktën dhjetë ditësh. Kjo do të thotë se rikthimi i tij në aksion nuk do të ndodhë para datës 10 tetor, datë kjo kur skuadra madrilene do të masë forcat me Villarrealin në kuadër të javës së tetë të kampionatit spanjoll, La Liga. Megjithatë, situata duket më e ndërlikuar përtej këtij afati, pasi ky dëmtim mund të sjellë komplikacione shtesë. Kjo gjë vë në pikëpyetje serioze edhe praninë e Mbappé në superpërballjen e Ligës së Kampionëve kundër Romës, e cila është programuar të zhvillohet në stadiumin “Olimpico” më 14 tetor. Pavarësisht kësaj periudhe rikuperimi, ish-sulmuesi i Paris Saint-Germain pritet të jetë plotësisht i gatshëm dhe në dispozicion të trajnerit për 'El Clásico'-n e parë sezonale kundër Barcelonës. Kjo superndeshje është caktuar të luhet më 25 tetor, duke filluar nga ora 21:00, në stadiumin “Camp Nou”.