KSHZ: Rrethi i dytë zgjedhor për kryetar të Bërvenicës do të mbahet më 1 nëntor, në garë Radiçevski dhe Jahiji

Komisioni Shtetëror i Zgjedhjeve sot njëzëri e miratoi konkluzionin për finalizimin e rezultateve nga rrethi i parë i zgjedhjeve të parakohshme për kryetar të Komunës së Bërvenicës, ku më 1 nëntor do të mbahet rrethi i dytë. Kryetari i KSHZ-së, Bojan Mariçiq në mbledhjen e sotme të 23-të informoi se kanë skaduar të dy afatet ligjore për parashtrimin e ankesave, ndërsa në Komision nuk është parashtruar asnjë ankesë. “Dua të informoj publikun se kanë skaduar të dy afatet për parashtrimin e ankesave, ai për procedurën e votimit, i cili skadoi dje në orën 19:00, dhe ai për procedurën e përcaktimit dhe përmbledhjes së rezultateve të votimit, i cili ishte deri sot në orën 12:30. Deri në skadimin e këtyre dy afateve, asnjë ankesë nuk ishte paraqitur në Komisionin Shtetëror të Zgjedhjeve”,tha Mariçiq. Sipas konkluzionit të miratuar, pas votimit të mbajtur më 18 tetor, në të cilin nuk u zgjodh kryetar në rrethin e parë të zgjedhjeve, rrethi i dytë në Bërvenicë do të mbahet më 1 nëntor. Në rrethin e dytë do të marrin pjesë kandidati me numër rendor 1, Stojanço Radiçevski nga koalicioni “Maqedonia e juaj”, i kryesuar nga OBRM-PDUKM dhe kandidati me numër rendor 6, Arkin Jahiji nga Aleanca Kombëtare për Integrim.