Sfida e Conference League, Aarhus paralajmëron Egnatian: Synojmë vetëm triumfin në Danimarkë

Këtë mbrëmje të nesërme, saktësisht në orën 21:00, Egnatia do të zbarkojë në tokën daneze për t'u matur me Aarhus në kuadër të sfidës së dytë për fazën e ligës në Conference League. Në prag të këtij takimi delikat, trajneri i skuadrës vendase, Jakob Poulsen, ka dalë para gazetarëve në konferencën zyrtare për shtyp. Ai ka shprehur vlerësimin maksimal për rreshtimin shqiptar, por ka bërë të qartë se objektivi i vetëm i danezëve mbetet arkëtimi i tri pikëve të plota. “Në çdo rast, kjo është qartazi një nga ndeshjet në programin tonë, për të cilën kemi thënë se do të donim të merrnim tri pikë. Nëse i shikoni turnetë e mëparshme, zakonisht duhet të arrini rreth shtatë pikë dhe një diferencë të arsyeshme golash; nëse e bëjmë këtë, atëherë duhet të jemi në gjendje t’i sigurojmë ato në një ndeshje si ajo e nesërmja,” u deklarua Poulsen gjatë prononcimit për media. Formacioni rrogozhinas vjen pas një barazimi mjaft pozitiv 1-1 kundër FC Midtjylland të enjten e kaluar, një paraqitje kjo që ka rritur ndjeshëm shkallën e kujdesit dhe të respektit brenda kampit të Aarhus. Megjithatë, mbrojtësi Frederik Tingager ka theksuar se çdo rezultat tjetër përveç fitores do të konsiderohej i papranueshëm për ambiciet e tyre në këtë kompeticion europian. “Nuk është një ekip për të cilin dimë shumë, por sigurisht është një ekip që e respektojmë, duke qenë se barazuan 1-1 kundër Midtjyllandit. Kjo dëshmon për njëfarë cilësie,” u shpreh ai fillimisht. “Por jemi gjithashtu plotësisht të vetëdijshëm se, nëse duam të ecim përpara, na duhen tri pikë nesër. Sigurisht, pas kësaj mbeten edhe katër ndeshje të tjera, por është e qartë se, nëse fitojmë nesër, do të jemi në një pozicion të mirë. Kjo është ajo që shpresojmë dhe kjo është ajo për të cilën do të luftojmë 100 për qind. Gjithsesi, asgjë nuk merr fund nëse arrijmë një barazim, por ne synojmë tri pikët,” përfundoi Tingager.