Çështja e Vlora Hysenit, Rama: Drejtësia të bëjë punën e saj, shteti ka detyrim të mbrojë institucionin e SHISH-it

Kryeministri Edi Rama ka dhënë qëndrimin e tij zyrtar lidhur me zhvillimet rreth ish-drejtoreshës së Shërbimit Informativ Shtetëror (SHISH), Vlora Hyseni, duke nënvizuar se procesi hetues dhe ai gjyqësor i përkasin vetëm organeve të drejtësisë. Gjatë deklaratës së tij, kreu i Qeverisë shtoi se krahas kësaj, ruajtja e integritetit të institucionit të inteligjencës nga çdo ndikim apo dëm anësor përbën një detyrim parësor shtetëror, ndërsa kërkoi që kjo çështje të diskutohet në Këshillin e Sigurisë të thirrur nga Kreu i Shtetit. “Hetimi dhe gjykimi i Vlora Hysenit është detyrë ekskluzive e drejtësisë, kjo nuk ka diskutim. Mbrojtja e SHISH nga çdo dëm kolateral të mundshëm është detyrë e gjithë shtetit dhe kjo s’duhet të hapë asnjë diskutim. Ndarja e pushteteve s’mund të shihet si ndarje nga përgjegjësia shtetërore,” deklaroi kryeministri. Më tej, ai theksoi domosdoshmërinë e një qasjeje të përbashkët dhe institucionale ndaj kësaj situate. “Ka ardhur koha ta trajtojmë bashkërisht dhe seriozisht. Këshilli i Sigurisë, thirrur njëherësh nga Presidenti, është vendi i duhur për të reflektuar dhe diskutuar mbi garancitë që duhet t’i mbrojnë institucionet tona, kur drejtuesit apo punonjësit rrëshqasin nga binarët dhe bëhen subjekt i një hetimi penal,” u shpreh ai. Në përmbyllje të fjalës së tij, duke iu referuar momentit të caktimit të masës së sigurisë, Rama ritheksoi vlerësimin e tij për angazhimin e deritanishëm të ish-drejtoreshës, duke sqaruar edhe rrugëtimin e saj profesional deri në krye të institucionit të inteligjencës. “Kur doli masa e arrestit, kam vlerësuar punën e Vlora Hysenit. Vlerësimi për punën e saj ka qenë i qartë. E vërteta është e thjeshtë. Fillimisht ka nisur të punojë prej meje si këshilltare, pas një periudhe të shkurtër në atë rol dhe, bazuar në referencat e partnerëve, është emëruar drejtuese e SHISH,” u shpreh Rama.