Tentoi t'i vinte zjarrin barit të thatë në Tetovë, 74-vjeçari digjet bashkë me makinën e tij

Një ngjarje e rëndë ka ndodhur në fshatin Pallaticë të Tetovës, ku një 74-vjeçar ka pësuar lëndime dhe djegie të rënda, pasi flakët që kishte ndezur për të pastruar pronën e tij dolën jashtë kontrollit dhe shkrumbuan automjetin e tij. Sipas informacioneve zyrtare nga Sektori për Punë e Brendshme (SPB) në Tetovë, ngjarja u vu re dhe u raportua mbrëmjen e djeshme, saktësisht në orën 15:15, pranë Njësisë Territoriale të Zjarrfikësve. Incidenti u regjistrua në një hapësirë tokësore të vendosur përgjatë aksit rrugor lokal që lidh fshatrat Pallaticë dhe Ozurmishtë. Nga hetimet dhe verifikimet e kryera në vendngjarje, autoritetet policore bënë të ditur se pronari i automjetit, i identitetit M.S., po pastronte tokën e tij bujqësore përmes djegies së barit të thatë. Situata ka dalë shpejt jashtë kontrollit, pasi flakët janë përhapur me shpejtësi të madhe, duke kapluar përfundimisht veturën e tipit "Volkswagen Golf", e cila ndodhej e parkuar aty pranë. Si pasojë e këtij incidenti, automjeti është bërë i papërdorshëm pasi është djegur plotësisht, ndërsa flakët kanë shkatërruar edhe një pjesë të konsiderueshme të sipërfaqes me bar të thatë. I moshuari është transportuar me urgjencë në Spitalin Klinik të Tetovës për të marrë trajtimin e nevojshëm mjekësor, ndërkohë që zjarrfikësit e qytetit kanë ndërhyrë në kohë duke neutralizuar dhe shuar përfundimisht vatrën e zjarrit.