Skandali me gjyqtarët/ Klubi i njohur rrezikon largimin nga kampionati

Klubi i Basanias po kalon një moment kritik, pasi drejtuesit dhe lojtarët ndihen të dëmtuar nga vendimet e gjyqtarëve për të dytën javë radhazi. Pas përballjes me Tërbunin, edhe ndeshja e fundit kundër Veleçikut ka sjellë tension dhe pakënaqësi të thella në kampin bardheblu, ndërkohë që dy humbjet e njëpasnjëshme kanë rënduar ndjeshëm ecurinë e skuadrës në tabelë. Trajneri i skuadrës, Arbër Shytani, ka ngritur zërin publikisht duke kritikuar hapur standardin e gjykimit në të dyja sfidat e fundit. Menjëherë pas qëndrimit të teknikut, presidenti i klubit, Ermir Shimaj, ka reaguar ashpër në rrjetet sociale duke mbështetur hapur trajnerin dhe duke paralajmëruar se ky trajtim i padrejtë nuk do të tolerohet më. “Përsëritet sërish edhe këtë javë e njëjta situatë. Ne po investojmë me dashamirësi në futboll, ndërkohë që me investimin tonë po tallen arbitrat, për të mos thënë më shumë! Të paktën për kategoritë e ulëta, të cilat i njoh mirë, niveli i pasionit dhe i ndërgjegjes në sektorin e arbitrimit është tejet, tejet i ulët, me përjashtime të rralla në aspektin pozitiv,” është shprehur ndër të tjera numri një i klubit. Në mbyllje të reagimit të tij, presidenti Shimaj ka lënë të kuptohet se situata ka kapërcyer çdo kufi të pranueshëm, duke paralajmëruar hapur se po vlerësohen të gjitha skenarët e mundshëm, përfshirë edhe largimin përfundimtar të Basanias nga aktiviteti zyrtar i kampionatit. “Kjo situatë nuk mund të pranohet më dhe realisht po shqyrtoj të gjitha opsionet, edhe tërheqjen nga kampionati,” ka përfunduar deklarata e tij. Ky reagim i fortë institucional vjen në një periudhë tejet të ndjeshme për Basanian, e cila synon stabilizimin e rezultateve, por që tashmë po përballet me një krizë të hapur lidhur me integritetin e garës.