Trazirat në kryeqytet: Policia vë në pranga 11 persona, mes tyre edhe dy të mitur

Autoritetet policore të Tiranës kanë finalizuar me arrestimin e 11 personave operacionin e ndjekur pas protestës së zhvilluar të martën në kryeqytet, ku pati tensione dhe përplasje. Në mesin e të ndaluarve, të cilët përfunduan në pranga, figurojnë shtetasit E. P. (29 vjeç), G. K. (24 vjeç), F. B. (19 vjeç), E. B. (23 vjeç), S. D. (52 vjeç), E. B. (27 vjeç), A. D. (23 vjeç), L. Z. (18 vjeç) dhe E. B. (20 vjeç), si dhe dy të mitur. Përveç tyre, strukturat e rendit nisën procedimin penal në gjendje të lirë edhe për 7 shtetas të tjerë. Në kuadër të hetimeve të thelluara të drejtuara nga specialistët për Hetimin e Krimeve në Komisariatin e Policisë Nr. 3, efektivët arritën të identifikojnë dhe të ndalojnë personat e përfshirë në sulmin ndaj godinës dhe efektivëve. Gjatë tubimit të tri ditëve më parë, protestuesit përdorën lëndë piroteknike, gurë dhe bomba molotov drejt Komisariatit Nr. 3, duke shkaktuar dëme materiale, zjarr dhe lëndimin e 10 punonjësve të policisë. Si pjesë e këtyre veprimeve, u prangos 33-vjeçari E. K., i dyshuar si një nga autorët e dëmtimit të ambienteve të këtij komisariati me sende të forta. Dosja me materialet e plota procedurale i ka kaluar Prokurorisë për ndjekje të mëtejshme ligjore. Të ndaluit akuzohen për një sërë veprash penale, duke përfshirë "Shkatërrimin e pronës", "Shkatërrimin e pronës me zjarr", "Goditjet për shkak të detyrës", "Organizimi dhe pjesëmarrja në grumbullime e manifestime të paligjshme", "Kundërshtimi i punonjësit të Policisë të rendit publik", "Prishja e qetësisë publike", "Mosbindja ndaj urdhrit të punonjësit të policisë së rendit publik", "Shkelja e rregullave mbi lëndët plasëse, djegëse dhe radioaktive", "Pengimi i qarkullimit të mjeteve", "Mbajtja pa leje dhe prodhimi i armëve, armëve shpërthyese dhe i municionit" si dhe "Prodhimi, mbajtja, blerja apo shitja pa leje e armëve të ftohta".