Anti-Doping zbardh listën e zezë: Pesë sportistë të ndëshkuar për substanca të ndaluara

Agjencia e Kosovës për Anti-Doping (KosADA) ka bërë publike regjistrin zyrtar ku figurojnë pesë sportistë të ndëshkuar për shkelje të rregullores kundër dopingut, transmeton portali ynë bazuar në të dhënat e institucionit kompetent. Sipas dokumentit zyrtar, bëhet fjalë për katër basketbollistë dhe një futbollist. Të gjitha këto raste janë konfirmuar pas testimit të mostrave, ku është dëshmuar prania e elementeve të ndaluara, duke rënë kështu në kundërshtim të drejtpërdrejtë me nenin 2.1 të kodit antidoping. Emri më i ri në këtë listë është basketbollistja Cloe Chapman, e cila është ndëshkuar për periudhën 9 qershor – 9 shtator 2026, pasi në mostrën e saj u konstatuan substancat THC dhe Carboxy THC. Ndërkaq, futbollisti Donat Hasanaj është vendosur në listë për kohëzgjatjen prej 5 dhjetor 2025 deri më 4 mars 2026, si pasojë e pranisë së substancës (N,N)-Didemetil-1-hidroksi-Sibutramina. Në këtë regjistër ndëshkimesh pason edhe dyshja e basketbollistëve Jason Jitoboh dhe Terrell Brown, të cilët janë dënuar nga 15 maji deri më 14 gusht 2025, si dhe Jordy Idikayi Tshimanga, me kohëzgjatje të sanksionit nga 6 marsi deri më 6 qershor 2024. Për të tre këta sportistë, substancat e evidentuara në mostra ishin po ashtu THC dhe Carboxy THC. Të gjitha vendimet përfundimtare dhe afatet përkatëse të pezullimit janë bërë publike në platformën zyrtare të KosADA-së, ku mund të lexohen detajet e plota të secilit rast.