Roma ndryshon ligjin: Deri në 12 vite burg për organizatorët e protestave të dhunshme në Itali

Ekzekutivi italian ka dhënë dritën jeshile për një paketë të re masash sigurie, e cila përbëhet nga tetë nene specifike, me qëllim frenimin e akteve të dhunës gjatë tubimeve publike. Kjo lëvizje vjen si përgjigje e drejtpërdrejtë ndaj incidenteve të rënda, trazirave dhe vjedhjeve me thyerje që tronditën Milanon dhe disa qytete të tjera të vendit gjatë fundjavës. “Skenat e dhunës janë të papranueshme, të cilat askush nuk mund t’i minimizojë dhe justifikojë”, u shpreh kryeministrja Giorgia Meloni gjatë prezantimit të këtij dekreti. Ndër risitë kryesore është edhe krijimi i një vepre të re penale që ndëshkon posaçërisht dhunën e organizuar gjatë manifestimeve. Sipas dispozitave të reja, qytetarët që marrin pjesë në protesta të dhunshme duke vënë në rrezik integritetin fizik të të tjerëve përballen me dënime prej 2 deri në 5 vite heqje lirie, si dhe gjoba që shkojnë deri në 20 mijë euro. Këto masa bëhen edhe më të rënda nëse autorët zgjedhin të mbulojnë fytyrat e tyre ose u shkaktojnë lëndime personave të tjerë. Teksti ligjor parashikon gjithashtu se individët që organizojnë apo nxisin – qoftë edhe përmes platformave online – grupime me qëllim zhvillimin e tubimeve të dhunshme, mund të dënohen me burgim nga 4 deri në 12 vjet. Njëkohësisht, janë shtrënguar ndëshkimet për dëmtimin e pronës, aktet e plaçkitjes dhe sulmet ndaj institucioneve publike, ndërsa një nga pikat kyçe mbetet faturimi i dëmeve: “Kush shkatërron paguan dhe nëse është i mitur paguajnë prinderit.” Ndryshimet ligjore përfshijnë edhe të miturit duke filluar nga mosha 14 vjeç, për të cilët ligji parashikon se i kuptojnë veprimet e tyre, përveç rasteve kur vërtetohet e kundërta. Për më tepër, masa e ndalimit parandalues – që deri më sot aplikohet vetëm për të rriturit – do të shtrihet edhe ndaj të miturve, duke përfshirë edhe kufizime të tjera për ata që shfaqin sjellje agresive. Për të garantuar rendin publik, “Në Milano do të vendosen 500 trupa ushtarake shtesë deri më 31 dhjetor, në mbështetje të policisë dhe karabinierëve”. Megjithatë, qeveria hoqi dorë nga neni që do t’i pajoste ushtarakët me kompetenca të policisë gjyqësore, duke përfshirë të drejtën e ndalimit dhe arrestimit. “Të protestosh është e drejtë, por të shkatërrosh qytetet tona nuk është. Shkatërrimi dhe vjedhja nuk janë protestë, por krim”, shtoi kryeministrja Meloni. Nga ana e tij, ministri i Mbrojtjes Guido Croseto i quajti trazirat si produkt të një lufte hibride të zhvilluar në rrjetet sociale, një tezë kjo që u kundërshtua nga Matteo Salvini. Ndërkohë, ministri i Brendshëm Matteo Piantendosi theksoi se sugjerime dhe pretendime të tilla nuk duhen anashkaluar apo nënvlerësuar në asnjë mënyrë.