Rrëzohet amendamenti për fondin e memorialit të fëmijëve të luftës, përplasje në Komision për Buxhetin

Komisioni për Buxhet ka rrëzuar amendamentin e propozuar nga deputetja e Aleancës, Teuta Haxhiu, i cili parashikonte ndarjen e 600 mijë eurove për ngritjen e një kompleksi memorial kushtuar fëmijëve të vrarë dhe të zhdukur gjatë konfliktit në Kosovë. Propozimi mori katër vota pro, asnjë kundër dhe gjashtë abstenime. Në fjalën e saj gjatë seancës, Haxhiu theksoi se edhe pas 27 vjetësh nga përfundimi i luftës, vendi ynë ende nuk poseduje një hapësirë të dedikuar memoriale ku qytetarët mund të vendosin lule për nderim të fëmijëve viktima të luftës. Nga ana e tij, ministri i Financave, Hekuran Murati, e kundërshtoi nismën duke shpjeguar se kompetenca për ndërtimin e memorialëve i takon Agjencisë për Menaxhimin e Komplekseve Memoriale, institucion që funksionon nën ombrellën e Ministrisë së Kulturës. Ai gjithashtu ngriti shqetësimin kohor, duke argumentuar se propozimi vjen në fund të muajit tetor dhe se afatet për procedurat e prokurimit dhe përmbylljen e kontratave deri më 31 dhjetor janë të pamundura për t'u realizuar. Murati e akuzoi Haxhiun për qasje jo serioze dhe për përdorim politik të kësaj teme, duke shtruar pyetjen se çfarë është bërë për këtë çështje gjatë periudhave kur subjekti i saj ka qenë pjesë e pushtetit. Në kundërpërgjigjen e saj, Haxhiu mbrojti kërkesën e saj, duke theksuar se ajo nuk është e re dhe se kode të ngjashme buxhetore kanë ekzistuar edhe në kabinetet e kaluara qeverisëse, si në kohën e kryeministrave Hashim Thaçi dhe Ramush Haradinaj, duke apeluar për ndjeshmëri njerëzore e institucionale ndaj kësaj çështjeje të ndjeshme. Ndërkohë, gjatë diskutimeve për Projektligjin e ndryshimeve buxhetore, deputeti i Partisë Demokratike të Kosovës, Mërgim Lushtaku, ka kritikuar ministrin Murati për mënyrën se si po i trajton propozimet e opozitës, duke i kërkuar atij që të lërë mënjanë polemikat për të kaluarën dhe të fokusohet te përgjegjësitë e tij aktuale qeverisëse.