Dridhet pushteti i Vuçiqit: Studentët marrin epërsinë para zgjedhjeve të 25 tetorit

Pak ditë para mbajtjes së zgjedhjeve parlamentare në Serbi, një sondazh i publikuar nga instituti hulumtues “Mendimi i Ri Politik Serb” (NSPM), i udhëhequr nga Gjorgje Vukadinoviq, ka sjellë një kthesë të papritur. Sipas këtyre të dhënave, lista e studentëve me sloganin “Studentët Fitojnë” ka kaluar në epërsi ndaj koalicionit “Serbia e Bashkuar” të presidentit Aleksandar Vuçiq. Sipas hulumtimit të realizuar në një mostër prej 1.050 qytetarësh, 44,5 për qind e të anketuarve janë shprehur pro listës së studentëve, ndërsa 42,7 për qind mbështesin formacionin politik të Vuçiqit. Partitë e tjera, si Partia Socialiste e Serbisë e Ivica Daçiqit (2,9%) dhe lista “Serbia Evropiane” e Marinika Tepiqit dhe Zdravko Ponošit (2,7%), rrezikojnë të mbeten nën pragun zgjedhor prej tre për qind. Vetë presidenti serb, Aleksandar Vuçiq, ka pranuar ekzistencën e një diference të ngushtë prej 1,5 për qind mes forcës së tij politike dhe kundërshtarëve. Në një intervistë televizive, ai deklaroi se mbështetja për “Serbinë e Bashkuar” është në rritje, por pranoi se rezultati përfundimtar do të varet nga pjesëmarrja në ditën e votimit, më 25 tetor 2026. Vuçiq u zotua se, në rast të një humbjeje, ai do ta pranojë rezultatin dhe do t’i urojë fituesit brenda orëve të vona të mbrëmjes së zgjedhjeve. Interesi i qytetarëve për këto zgjedhje duket të jetë tejet i lartë. Rreth 79,8 për qind e të anketuarve kanë konfirmuar se do të dalin me siguri në votime, ndërsa 13,3 për qind kanë shprehur gatishmëri të lartë për pjesëmarrje. Për sa i përket orientimit politik, 44 për qind e të anketuarve besojnë se një fitore e studentëve dhe opozitës do të ishte zgjidhja më e mirë për vendin, krahasuar me 22,5 për qind që dëshirojnë ruajtjen e status-quosë. Anketa, e zhvilluar përmes telefonit në periudhën 25 shtator – 5 tetor, është realizuar nga NSPM për nevoja të brendshme dhe pa porositës. Megjithëse instituti thekson se këto rezultate nuk duhet të shihen si projeksion i prerë zgjedhor, ato pasqyrojnë një klimë të ndryshuar politike në prag të procesit të së dielës.