SHBA kërkon shuarjen e UNMIK-ut në OKB: Misioni e ka përfunduar misionin e tij

Këshilli i Sigurimit i Organizatës së Kombeve të Bashkuara ka përmbyllur seancën e radhës dedikuar zhvillimeve në Kosovë, ku në fokus ishin gjendja e sigurisë, ecuria e dialogut me Serbinë dhe fati i misionit të UNMIK-ut. Gjatë këtij debati, përfaqësuesit ndërkombëtarë vlerësuan përpjekjet për stabilitet, ndërsa rikonfirmuan nevojën për sundim të ligjit dhe normalizim të raporteve ndërshtetërore. Republika e Kosovës u përfaqësua nga zëvendëskryeministri i parë dhe ministri i Punëve të Jashtme dhe Diasporës, Glauk Konjufca. Ai paraqiti pasqyrën e progresit shtetëror, por njëkohësisht ngriti alarmin për sfidat e sigurisë, duke kërkuar drejtësi për sulmet e dhunshme që kanë cenuar integritetin e vendit. Në fjalën e tij, Konjufca u ndal veçanërisht te sulmi terrorist në Banjskë dhe ai ndaj infrastrukturës së rëndësishme në Ibër-Lepenc. Ministri kërkoi llogaridhënie të plotë për këto akte, duke iu referuar edhe lidhjeve të zyrtarëve serbë me Milan Radoiçiqin, si dëshmi e nevojës urgjente për t’i dhënë fund pandëshkueshmërisë së atyre që destabilizojnë rajonin. Një moment kyç i mbledhjes ishte qëndrimi i Shteteve të Bashkuara të Amerikës, të cilat artikuluan qartë kërkesën për përfundimin e mandatit të UNMIK-ut. Përfaqësuesja amerikane, Tammy Bruce, argumentoi se ky mision e ka tejkaluar kohën dhe qëllimin për të cilin u themelua, duke mos pasur më rol thelbësor në qeverisjen e Kosovës së pasvitit 1999. “Qëndrimi ynë për UNMIK-un mbetet i pandryshuar. Misioni e ka jetuar kohën e vet dhe ky Këshill duhet ta mbyllë atë”, deklaroi Bruce. Ajo nënvizoi se Kosova e sotme ka kapacitete të tjera dhe se prania e mekanizmave si KFOR-i, EULEX-i apo OSBE-ja është më e përshtatshme për realitetin aktual. Sipas Uashingtonit, paqja afatgjatë nuk ndërtohet nga sallat e OKB-së, por përmes angazhimit të drejtpërdrejtë të Prishtinës dhe Beogradit. Në anën tjetër, Franca shprehu mbështetjen e saj për vazhdimësinë e bashkëpunimit ndërmjet UNMIK-ut, KFOR-it dhe misionit evropian EULEX. Përfaqësuesi francez vlerësoi përparimin institucional në Kosovë dhe bëri thirrje për ruajtje të vazhdueshme të stabilitetit, duke inkurajuar palët që të vazhdojnë rrugën drejt paqes së qëndrueshme.