Konjufca nga OKB: Dënimet e Speciales përmbajnë gabime, presim korrigjimin e tyre në apel

Ministri i Punëve të Jashtme dhe Diasporës, Glauk Konjufca, gjatë fjalimit të tij në Organizatën e Kombeve të Bashkuara, ka komentuar vendimet e fundit të Dhomave të Specializuara të Kosovës ndaj ish-udhëheqësve të Ushtrisë Çlirimtare të Kosovës. Ai shprehu bindjen se këto aktgjykime përmbajnë pasaktësi dhe shfaqi shpresën se drejtësia do të vihet në vend përmes procesit të apelit. Në një përplasje diplomatike, kryediplomati kosovar i është kundërpërgjigjur ministrit të Jashtëm të Serbisë, Marko Gjuriq. Konjufca akuzoi homologun e tij serb për shpërfillje të viktimave, duke theksuar se Gjuriq nuk e përmendi në asnjë moment fatin e 12 mijë civilëve shqiptarë të vrarë gjatë konfliktit në Kosovë. “Asnjë fjalë nga ministri Gjuriq për 12 mijë shqiptarët e vrarë. Këtë e quaj unë mohim të drejtësisë”, deklaroi ai. Konjufca ritheksoi përkushtimin e Kosovës ndaj drejtësisë ndërkombëtare, duke nënvizuar se shteti ka bashkëpunuar vazhdimisht me Tribunalin e Hagës dhe instancat e tjera gjyqësore, pa bërë dallime etnike në trajtimin e krimeve të luftës. Lidhur me vetë Dhomat e Specializuara, ai rikujtoi se ato u krijuan nën presionin e aleatëve ndërkombëtarë për të adresuar pretendimet e Serbisë, përfshirë ato famëkeqe për trafikim organesh. “E kemi ditur që nga fillimi që këto kanë qenë fabrikime me qëllim të diskreditimit të forcës sonë mbrojtëse dhe luftës sonë çlirimtare”, pohoi Konjufca. Megjithatë, ai vuri në dukje se vetë gjykata ka sqaruar se në bankën e të akuzuarve nuk është UÇK-ja dhe se vendimet e saj nuk kanë për qëllim të njollosin luftën për liri apo shpalljen e pavarësisë së Kosovës. Në përfundim, ministri Konjufca përsëriti qëndrimin zyrtar të Prishtinës se vendimet e dhëna deri më tani ndaj ish-krerëve të UÇK-së nuk janë përfundimtare dhe se pritet që gabimet e evidentuara të riparohen gjatë shqyrtimit në shkallën e dytë të gjyqësorit.