Përplasje automjetesh në Prizren, një person përfundon në spital

Një aksident rrugor ka ndodhur gjatë pasdites së sotme në rrugën “Transiti i vjetër” në qytetin e Prizrenit, duke lënë të lënduar një person, konfirmoi për portalin tonë zëdhënësi i Policisë për rajonin e Prizrenit, Shaqir Bytyqi. Në këtë ngjarje rrugore janë përfshirë dy vetura, të cilat, përveç lëndimeve të pësuara nga personi, kanë pësuar edhe dëme të konsiderueshme materiale. “Njësitë policore kanë mbërritur menjëherë në vendin e ngjarjes për të menaxhuar situatën”, u shpreh Bytyqi. Ai shtoi gjithashtu se autoritetet kompetente kanë nisur procedurat hetimore për të zbardhur plotësisht rrethanat dhe shkaqet që sollën deri te ky aksident.